Ցանկացած «նվիրատվություն» պետությանը պետական ռեկետի ուղղակի օրինակ է

Երբ օգոստոսին Նիկոլ Փաշինյանը Հանրապետության հրապարակից բանկային գաղտնիք հանդիսացող տվյալներ էր հայտնում ու ասում, որ «Սաշիկ Սարգսյանը մի բանկում 30 միլիոն դոլար ունի, ուրեմն՝ թող իմանա, որ էդ փողը պետք ա բերի ու վերադարձնի ժողովրդին», շատերն ուրախանում էին դրանից: Շատերն այս հայտարարությունից հասկացան, որ Նիկոլ Փաշինյանն, ըստ էության, հայտարարում է պետական ռեկետ անելու մասին, իսկ թե ինչ եղավ դրանից հետո, շատ հուզիչ է:

Ուրեմն՝ Մանվել Գրիգորյանը, որին բռնել են փաստացի տուշոնկա գողանալու, իսկ ֆորմալ` միայն ապօրինի զենք-զինամթերքի համար, հայտարարում է, որ պատրաստ է «կամավոր» իր սեփականությունը հանձնել պետությանը: Երեկ արդեն պարզ դարձավ, որ Սաշիկն ու Արմեն Ավետիսյանն են «կամավոր» իրենց ունեցվածքը հանձնում պետությանը, իսկ պետությունն այդ ունեցվածքը «դնելու է աճուրդի» և աճուրդից գոյացած գումարը փոխանցելու է պետբյուջե: 

Պետական ռեկետի ողջ հմայքը պատկերացնելու համար շատ հատկանշական փակագծեր բացեց Նիկոլը վերջին երկու օրերին, մասնավորապես՝ տառացի ասաց, որ «որոշ մարդիկ բոմժ են դառնալու էս ամեն ինչի արդյունքում»: Նիկոլը ճիշտ ասաց՝ ինքը հաստատապես էս ռեկետի արդյունքում փորձելու ա կապիտալի վերաբաշխում անել, ինչի արդյունքում իրեն հնազանդ «նոր օլիգարխները» «աճուրդով» ձեռք կբերեն նախկին թալանչիների թալանի արդյունքում ձևավորված կապիտալը, իսկ նախկինները կդառնան բոմժ: 

Ասածս չխեղաթյուրելու համար մի պարզաբանում անեմ. ցանկացած թալանված գումար պետությանը հետ վերադարձնելու իրավական ձևեր գոյություն ունեն, բայց այդ ձևերի մեջ որևէ կերպ չեն կարող մտնել քրեական գործեր հարուցելու և սպառնալիքի միջոցով տվյալ թալանչիներից գույք և գումար «նվեր ստանալը»: Այն մարդը, գործարարը, ով «պատրաստակամություն» է հայտնում այդքան կապիտալ «նվիրել» պետությանը պետության առաջին դեմքի սպառնալիքներից հետո, նվազագույնն անկեղծ չէ, իսկ իրականում այդ մարդը ՎԱԽԵՑԱԾ է և, բառի բուն իմաստով, ՌԵԿԵՏԻ է ենթարկվում պետության կողմից:

Եվ ուրեմն՝ ցանկացած նմանատիպ «ՆՎԻՐԱՏՎՈՒԹՅՈՒՆ» պետությանը պետական ՌԵԿԵՏԻ ուղղակի օրինակ է, և այդ ռեկետի ուղղակի իրականացնողն ու միակ պատասխանատուն հենց Նիկոլ Փաշինյանն է: Իսկ թե այս ամեն ինչն ինչպիսի բացասական հետևանքներ կունենա օտարերկրյա ներդրումների համատեքստում, դատեք ինքներդ: 

ՀԳ. Նիկոլի` քարոզարշավին մասնակցելը կոդազերծում է իշխանությունների ողջ քաղաքական «իզմ»-ը, որը ոչ միայն պոպուլիզմն է, այլև ՖԱՇԻԶՄԸ կամ փաշիզմը: