Նաիրա Զոհրաբյանը ԲՀԿ-ի և որևէ կուսակցության կոալիցիա կազմելու հարցին անդրադառնալու իմաստ է տեսնում միայն ընտրություններից հետո
10:50 , 13 նոյեմբեր, 2018Armenpress.am-ը գրում է.
ԱԺ «Ծառուկյան» խմբակցության պատգամավոր Նաիրա Զոհրաբյանի կարծիքով` բացառապես խորհրդարանական ընտրություններից հետո կարող են անդրադառնալ այն հարցին, թե ինչպիսի հետընտրական կոալիցիաներ, պայմանավորվածություններ կլինեն:
«Արմենպրես»-ի հաղորդմամբ` Զոհրաբյանը նման տեսակետ հայտնեց ԱԺ-ում լրագրողների հետ զրույցում:
«Թե ինչպիսի հետընտրական կոալիցիաներ, պայմանավորվածություններ, զարգացումներ կլինեն, այս բոլոր հարցերին իմաստ կունենա անդրադառնալ բացառապես միայն դեկտեմբերի 9-ի արտահերթ խորհրդարանական ընտրություններից հետո: Որևէ մեկն այս պահին չի կարող կանխատեսել ընտրությունների արդյունքը»,- ասաց պատգամավորը:
Նրա կարծիքով` ընտրությունների բովանդակությունը կախված է քաղաքական ուժերից: «Եթե քաղաքական ուժերը չզբաղվեն ամեն օր ապատեղեկատվություն մեկնաբանելով, այլ հնարավորություն տրվի հանրությանը ներկայացնելու տնտեսական, քաղաքական օրակարգ, մեզանից յուրաքանչյուրի նախընտրական ծրագիրը, հավատացնում եմ, որ ընտրությունները կլինեն բովանդակային»,-նշեց Զոհրաբյանը:
Նրա հավաստմամբ` իրենց ԲՀԿ-ն առաջ է գնում` օրակարգում ունենալով իրենց քաղաքական և տնտեսական ծրագիրը: «Մեր զրուցակիցը լինելու է ՀՀ քաղաքացին: Մենք չենք պատրաստվում մարտի բռնվել մնացած քաղաքական ուժերի հետ, բոլորին կոռեկտ ընտրության կոչ ենք անում, ով կխախտի կոռեկտության սահմանը, ով կանցնի ընտրապայքարի համար թույլատրելի կարմիր գիծը, բնականաբար, համարժեք պատասխան կստանա»,- եզրափակեց պատգամավորը: