Տխրությո՞ւն, թե՞ դեպրեսիա. ինչպես տարբերակել մելանխոլիան լուրջ խանգարումից

Մարդիկ ունակ են վերապրելու տարատեսակ էմոցիաների լայն դիապազոն: Այդ էմոցիաներից մեկը տխրությունն է: Ժամանակ առ ժամանակ բոլորն էլ ունենում են տխրության զգացողություն, սակայն հաճախ այն այնքան ուժգին է լինում, որ դժվար է լինում տարբերել դեպրեսիայից: Երկուսի պատճառն էլ սթրեսային իրավիճակներն են, սակայն դեպրեսիան պահանջում է լուրջ բուժում:

Եկեք նախ հասկանանք, թե ինչ երևույթներն են բնորոշում տխրությունը:

• Հիմնականում տխրության համար լինում է կոնկրետ պատճառ, անգամ եթե այն շատ բացահայտ չէ:
  
  
• Դուք շարունակում եք հաճույքով զբաղվել սիրելի գործով:
  
  
• Սնվելու և քնելու ռեժիմներում չկան զգալի և հաստատուն խախտումներ:
  
  
• Տխրության զգացողությունը երբեմն անցնում է՝ տեղը զիջելով ուրախությանը, հատկապես երբ զբաղվում եք սիրելի գործով:
  
  
• Ժամանակ առ ժամանակ առաջանում են ինքնաքննադատական մտքեր, սակայն դրանք չեն գրավում ձեր գիտակցությունը:

Որոշ ժամանակ անց տխրությունն անցնում է, և դուք վերադառնում եք ձեր կյանքի բնականոն ռիթմին:

Իսկ այ դեպրեսիան այդքան հեշտ չի անցնում, դա հոգեբանական վիճակ է, որի ազդեցությամբ փոխվում են ուղեղի ֆունկցիաները: Այն արտահայտվում է ինչպես հոգեբանական, այնպես էլ ֆիզիկական ախտանիշներով:

Պրոֆեսիոնալ հոգեբանները դեպրեսիան ախտորոշելու համար առանձնացրել են որոշակի ախտանիշներ, որոնք պետք է առկա լինեն ամենաքիչը 2 շաբաթ: Ահա դրանք՝

• Անդադար ընկճված և նյարդային վիճակ:
  
  
• Նախկինում հաճույք պատճառող զբաղմունքների հանդեպ հետաքրքրության կորուստ:
  
  
• Աշխորժակի կտրուկ անկում կամ աճ, ինչն ուղեկցվում է համապատասխանաբար քաշի կորստով կամ ավելացմամբ:
  
  
• Անքնություն կամ էլ նորմայից ավելի քնկոտություն:
  
  
• Հոգնածության ուժգին զգացում:
  
  
• Անհանգստության նոպաներ առանց պատճառի:
  
  
• Միայնության, անպետքության, դատարկության և մեղքի զգացումներ:
  
  
• Մտավոր աշխատանք կատարելիս բարդություններ, կենտրոնացման հետ խնդիրներ:
  
  
• Սուիցիդալ մտքեր:

Դեպրեսիայով տառապողների մոտ պարտադիր չէ, որ արտահայտված լինեն այս բոլոր ախտանիշները, դրանք կարող են ի հայտ գալ ժամանակի ընթացքում տարբեր չափաբաժիններով: Դեպրեսիան շատ վատ կերպով է անդրադառնում կյանքի և մտերիմների հետ հարաբերությունների վրա: Եթե դուք ձեզ մոտ նկատում եք դեպրեսիայի ախտանիշներ, ապա անհապաղ դիմեք բժշկի, ձեզ օգնություն է հարկավոր: