Բողոք չունենք. Մխիթարյանի մայրը՝ տղայից դիվանագիտական անձնագիրը վերցնելու մասին

ՀՀ ֆուտբոլի ազգային հավաքականի եւ «Արսենալի» կիսապաշտպան Հենրիխ Մխիթարյանի մայրը՝ Մարինա Թաշչյանը, նշում է, որ իրենք բողոք չունեն այն կապակցությամբ, որ ՀՀ ԱԳՆ-ն ֆուտբոլիստից հետ է վերցրել դիվանագիտական անձնագիրը: Այսօր՝ սեպտեմբերի 26-ին, այդ տեղեկությունը լայն քննարկման առարկա է դարձել մամուլում: Ինչպես «Հայկական ժամանակ»-ի հետ զրույցում ՀՖՖ գործկոմի անդամ Մարինա Թաշչյանը նշեց, Մխիթարյանը դիվանագիտական անձնագիրը ստացել է 2 տարի առաջ եւ հետ է վերադարձրել 2 ամիս առաջ: Նա նաեւ ասաց, որ իրենք ոչնչից չեն դժգոհում:

«Ոչ բողոքելու բան ունենք, ոչ էլ պարտավորեցնում ենք, որ տան»,- ասաց նա՝ ավելացնելով, որ իրենք չեն դիմելու ՀՀ կառավարություն անձնագիրը վերականգնելու համար:

Մարինա Թաշչյանը նշեց, որ դիվանագիտական անձնագիրը որդուն օգնում էր բազմաթիվ դեպքերում խուսափել փաստաթղթային քաշքշուկներից: Ասաց, որ ակումբի ու հավաքականի հանդիպումների գրաֆիկը շատ խիտ է, ու դա վիզայի հետ կապված ավելորդ լարվածություն չունենալու միջոց էր: Ամեն դեպքում, Թաշչյանն ընդգծեց, որ հիմա որդին ճանապարհորդելիս խնդիրներ չի ունենում:

««Արսենալն» այն ակումբը չէ, որ թողնի՝ քաշքշուկի մեջ ընկնի»,- ասաց նա՝ ավելացնելով, որ պարզապես ավելորդ աշխատանք է կատարվում փաստաթղթերի հարցում:

Թաշչյանը նշեց, որ որդին իր դերն ունի Հայաստանն աշխարհում ճանաչելի դարձնելու հարցում: Ըստ նրա՝ ՀՀ-ն մի շարք դեպքերում ճանաչում են որպես Մխիթարյանի հայրենիք: Ասաց, որ անձնագիրը վերադարձնելու վերաբերյալ նամակը ստանալուց հետո Մխիթարյանն անմիջապես արել է դա, սակայն ազդվել է:

«Շատ ազդվել էր, շատ նեղվել էր»,- ասում է նա՝ ավելացնելով, որ դա պարզապես վերաբերմունք էր:

Մխիթարյանը միակը չէ, ում դիվանագիտական անձնագիրը հետ է վերցվել: Ավելի վաղ ՀՀ արտաքին գործերի նախարարության խոսնակ Տիգրան Բալայանը հայտնել էր, որ չեղարկվել է 254 քաղաքացու դիվանագիտական անձնագիր: