Armenpress.am-ը գրում է.
Ծառայության հեշտացված օրվա կարգացուցակով (ԾՀՕԿ) առաջին անգամ զինծառայության է անցել 200-ից ավելի երիտասարդ:
«Արմենպրես»-ի հաղորդմամբ՝ ՀՀ ՊՆ հանրապետական հավաքակայանում, օգոստոսի 11-ին լրագրողների հետ ճեպազրույցում այս մասին ասել է ՀՀ զինվորական կոմիսար, գեներալ-մայոր Հենրիկ Մուրադյանը:
«Նրանց համար հիմնականում կան առանձնացված զորամասեր և՛ Հայաստանի, և՛ Արցախի Հանրապետությունների տարածքներում: Այս տարբերակով ծառայող տղաները զինծառայությունն անց են կացնելու հատուկ պայմաններում»,- նշել է Մուրադյանը:
2018 թվականի ամառային զորակոչի ընթացքում ավելացվել է զինծառայության ևս մեկ տարբերակ՝ Ծառայություն հեշտացված օրվա կարգացուցակով (ԾՀՕԿ): Այս պարագայում կզորակոչվեն առողջական որոշ խնդիրներ ունեցող զորակոչիկները՝ գիշերամիզություն ունեցողները, թերքաշայինները (նորմայից 2 կգ պակաս լինելու դեպքում՝ 43-45 կգ), գերքաշայինները (նորմայից 4 կգ ավել լինելու դեպքում) ու հեմոգլոբինի ցածր կամ բարձր մակարդակ ունեցողները: