Մարիա Չանդիրյանին շատերը ճանաչում են որպես պարուհու: Ոչ ստանդարտ արտաքինով հայուհին նկարահանվել է մի շարք տեսահոլովակներում: Մարիան, այնքան էլ չհեռանալով իր հիմնական մասնագիտությունից, հիմա հանդես է գալիս նաև որպես դերասանուհի՝ նկարահանվելով «Շանթ» հեռուստաընկերությամբ հեռարձակվող «Outdance» պարային սիթքոմում: Վերջերս BlogNews.am-ը ներկա էր նկարահանման հրապարակում ու պարուհի-դերասանուհու հետ զրուցել է դերասանական առաջին փորձի, նկարահանման բարդությունների ու հետաքրքրությունների մասին:
11 տարի պրոֆեսիոնալ պարով զբաղվող Մարիան «Outdance» սիթքոմին միացել է երկրորդ եթերաշրջանից, ընդ որում՝ ոչ միայն որպես դերասանուհի է հանդես գալիս, այլ նաև բեմադրում է սիթքոմի բոլոր պարային համարները. «Երբ ստացա առաջարկը, միանգամից համաձայնեցի, չնայած փոքր-ինչ վախ կար, որ ոճը մեկը չէ, ու պետք է անընդհատ աշխատել բոլոր ոճերով՝ տարբերվող ու հետաքրքիր բեմադրություններ ներկայացնելու համար: Կարծում եմ՝ կարողացա հաղթահարել: Ինձ համար այս պրոցեսն այնքանով է հետաքրքիր, որ ստեղծագործում եմ և՛ backstage, և՛ onstage: Այս միաբանությունից անասելի հաճույք եմ ստանում: Արագ եմ ինտեգրվել միջավայրին: Նկարահանումներն անցնում են շատ թեթև ու հումորային մթնոլորտում: Եթե երկու օր իրար չենք տեսնում, հասկանում ենք, որ արդեն կարոտել ենք իրար»:
Մարիան լավ է գնահատում նաև իր դերասանական խաղը: Ասում է՝ տեսախցիկներն իրեն չեն կաշկանդում, իսկ կերպարն այնքան մոտ է իր տեսակին, որ բարդություններ առանձնապես չեն լինում. «Կան տաղանդավոր մարդիկ և կան աշխատասեր մարդիկ: Եթե դու հավատում ես քո ուժերին ու անդադար աշխատում ես, բացառվում է չստացվելու հավանականությունը: Իմ դեպքում այդպես է: Արիանան միամիտ ու բարի աղջիկ է, չի ուզում ոչ մեկին վատություն անել, բայց միշտ հակառակն է ստացվում: Շրջակայքում ամեն ինչ ջարդուփշուր է անում, բայց ոչ դիտավորությամբ: Նա ուղղակի կերպար է, ու ես գժվում եմ իր համար: Մեկ-մեկ անգամ սովորում եմ Արիանայից»:
Խոսելով մարդկանց արձագանքի մասին՝ Մարիան ասում է, որ մինչ սիթքոմն էլ իրեն ճանաչում էին փողոցում ու հետաքիքրի մոտեցում ցուցաբերում իր անսովոր արտաքինին. «Նախկինում ասում էին՝ վա՜յ, էն պարող չինացի աղջիկը: Հիմա էլ փոքր երեխաները վազելով գալիս են մոտ ու ասում. «Ա՜, Արիանան։ Ոչ մի բան չես ջարդի, չէ՞»: Ընկալման հետ կապված մի քիչ խնդիր կա, չեն հասկանում, որ կերպարը քո հետ կապ չունի, բայց ես, միևնույն է, չեմ նեղվում դրանից: Հաճելի է ամեն դեպքում»:
Հարցին՝ օգնում, թե խանգարում է անսովոր արտաքին ունենալը, Մարիան պատասխանեց. «Ինչ ծնվել եմ, այսպիսին եմ ու սովոր եմ արդեն: Ես չգիտեմ՝ ինչպես է ստացվում, երբ մարդ չի լինում ուշադրության կենտրոնում: Իմ արտաքինը ո՛չ խանգարում է, ո՛չ օգնում: Եթե լինես տարբերվող արտաքինով, բայց չունենաս բովանդակություն, քեզ ոչ ոք չի նկատի»,- եզրափակեց պարուհին: