Այսօր նախագահ Սերժ Սարգսյանի քավորությամբ գրոսմայստեր Լևոն Արոնյանն ու ֆիլիպինուհի Արիանա Կաոլին իրար հավերժ սեր խոստացան Սաղմոսավանքում: Պսակադրության ուշագրավ ու բացառիկ կադրերը, հյուրերն ու հարսանեկան արարողության մանրամասները՝ BlogNews.am-ի անդրադարձում:
Արիանան մի առիթով նշել է, որ ամուսնությունն իրենց համար հարաբերությունների հաջորդ փուլ է նշանավորում. «Կարծում եմ՝ ամուսնության պետք է գնան երկու ամբողջական մարդիկ: Չպետք է լինեն կեսեր՝ Լևոնը կամ Արիանան: Մարդիկ պետք է լինեն կայացած՝ թե՛ հոգեպես, թե՛ զգացմունքների և բարոյականության տեսանկյունից: Ամուսնության ժամանակ զույգերն ամբողջությամբ նվիրվում են միմյանց: Շատերը կարծում են, որ ամուսնությունը երկու կեսերի միություն է, բայց այսպես բացասական կախվածություն է ծնվում նրանց միջև։ Երբ դու կայացած, «լիքը» մարդ ես, սովորում ես, վերցնում ես և կարող ես տալ, ուրեմն՝ կկարողանաք երկուսով սեր ու աշխատանք ներդնել ձեր հարաբերությունների մեջ ու ամուր ընտանիք կունենաք։ Մենք արդեն պատրաստ ենք ամուսնության»,- ասել է Արիանան:
Թեև Լևոնն ու Արիանան այս ընթացքում ավելորդ ու արհեստական ուշադրություն չեն ստեղծել հարսանիքի մասին բարձրաձայնելով, սակայն միանգամայն բնական է զույգի հետ կապված հանրային հետաքրքրությունը:
Ավանդականի ու ժամանակակից էլեմենտների օգտագործմամբ հարսանեկան արարողություն կազմակերպելու համար հայկական շախմատի առաջատարը մոտ 120 հազար դոլար է ծախսել: Խաչեղբայրը Լևոնի մտերիմ ընկերն է՝ Հրանտը, ով նաև շախմատիստի մենեջերն է: Հրավիրված է շուրջ 370 հյուր, զույգն իրենց օրը նշում է մտերիմ ընկերների ու բարեկամների հետ, հրավիրյալների թվում են նաև արտերկրից ժամանած հյուրեր: Հարսանեկան միջոցառումը տեղի է ունենալու «Ռեդիսոն Բլյու» ռեստորանային համալիրում:
Արիանան ամուսնական մանրամասներով և աղջկական թիթիզությամբ այդքան էլ տարված չէ: Անձամբ է զբաղվել հարսանեկան դետալներով, բայց առանձնապես ճոխության հետևից չի ընկել: Նրա համար առաջնայինը ամուսնության խորհուրդն է: Եթե աղջիկներից շատերը դեռ երիտասարդ տարիքից են որոշում հարսանեկան սանրվածքի, զգեստի ձևն ու գույնը, ապա Արիանան այդ ամենը որոշել է վերջին երկու շաբաթվա ընթացքում:
Արիանան փոխարենը վերջին երեք ամսվա ընթացքում ջանասիրաբար տորթերի համտեսով է զբաղվել: Լևոնի սիրելին շատ է կարևորում հարսանեկան տորթի ընտրությունը: Այն լինելու է «Օրեո» թխվածքաբլիթի համով, որն Արիանայի սիրելի քաղցրավենիքն է:
Զույգն առաջին հարսանեկան տանգոն պարելու է «Նոթատետր» ֆիլմից ընտրված երգի ներքո՝ Բիլի Հոլիդեյի կատարմամբ: Ֆիլիպինուհին անպայման նաև ուզունդարա է պարելու: Չի բացառվում, որ Արիանան Չարենց, Սևակ կամ Թումանյան արտասանի:
Քանի որ Արիանան ընդգծված սեր ունի Արցախի հանդեպ, զույգը նախապես պլանավորել էր հարսանեկան արարողությունը այնտեղ կազմակերպել, սակայն չի ստացվել: Նորապսակները երազում են ամուսնության տարեդարձը այնտեղ տոնել ու էլի փոքրիկ հարսանիք կազմակերպել:
Ի դեպ, Լևոնն ու Արիանան «գործարք» են կնքել: Գեղեցկուհին զբաղվել է հարսանեկան արարողությամբ, սիրելին էլ՝ մեղրամսի կազմակերպմամբ, որը անակնկալ է լինելու: Հավանաբար զույգը Հնդկաստան կմեկնի, բայց թե երբ, դժվար է ասել. մինչև տարեվերջ Լևոնը մրցումներ ունի։
BlogNews.am-ը շնորհավորում է զույգին՝ մաղթելով հարատև սեր, երջանկություն ու ներդաշնակ կյանք:
Նյութը՝ Էմմա Վարդանյանի
Լուսանկարները՝ Գև Խուրշուդյան