Լապշինը հետաքրքիր չէ Կրեմլին
15:25 , 20 հուլիս, 2017Լրագրողի այն հարցին, թե Բաքվի դատարանի կողմից 3 տարի ազատազրկման դատապարտված բլոգեր Ալեքսանդր Լապշինի դատավարությանն արդյոք հետևել են Կրեմլում և կարող է պահանջեն էքստրադիցիայի ենթարկել վերջինիս Ռուսաստան, ՌԴ նախագահի մամլո խոսնակ Դմիտրի Պեսկովը շատ լակոնիկ պատասխանել է. «Ո՛չ, դա Կրեմլի թեման չէ»։
Որքան կարելի է կռահել հարցից, դրա հեղինակն ադրբեջանցի է, որը կատարել է Բաքվից ստացած հրահանգը՝ այդպիսի հարց ուղղելով Պուտինի մամլո քարտուղարին և փորձելով առնաձնահատուկ ուշադրություն գրավել Լապշինի ազատազրկման շուրջ։ Սակայն Պեսկովը շատ մատչելի հասկացրել է, որ Լապշինի գործն «այդ տրամաչափի չէ», որ նրանով հատուկ հետաքրքրվեն Կրեմլում։
Հիշեցնեմ, որ երեք պետությունների՝ ՌԴ-ի, Ուկրաինայի և Իսրայելի քաղաքացի Ալեքսանդր Լապշինին Բաքվի ծանր հանցագործությունների դատարանն այսօր դատապարտել է 3 տարի ազատազրկման։
«Լապշին շոու»-ն հիմա էլ այլ ուղղությամբ է տարվում։ Ժամանակին Կիևը և Թել Ավիվը, ովքեր շատ ակտիվ մասնակցում էին ազերիների այս ֆարսին և օգնում էին Բաքվին, Լապշինի գործը հիմնականում թողեցին Մոսկվայի ուսերին։ Դա հատուկ ծրագրված էր Իլհամ Ալիևի աշխատակազմում, քանի որ Լապշինը բավական թանկ գնով պետք է վաճառվել։ Բաքվում նախընտրում են բլոգերին փոխանակել «քարվաճառյան մարդասպաններ» Դիլգամ Ասկերովի և Շահբազ Գուլիևի հետ։ Հատկապես Դիլգամ Ասկերովի, որը ՌԴ քաղաքցի է։
Հ.Գ. Տեսնես՝ ինչո՞ւ նույն հարցերով ազերի լրագրողները չեն դիմում Իսրայելի վարչապետի մամլո խոսնակին։ Պատասխանը շատ պարզ է։