Սպիտակ տունը բացատրել է՝ ինչու Թրամփը չի սեղմել Մերկելի ձեռքը

Սպիտակ տան մամլո քարտուղար Շոն Սփայսերը բացատրել է՝ ինչու Դոնալդ Թրամփը չի սեղմել Գերմանիայի կանցլեր Անգելա Մերկելի ձեռքը՝ չնայած լրագրողների խորհրդով դա անելու նրա պատրաստակամությանը: Նրա խոսքերը ներկայացնում է Spiegel-ը:

«Չեմ կարծում, որ նա լսել է հարցը»,- հայտարարել է Սփայսերը՝ նշելով, որ այդ իրավիճակի պատճառը «թյուրիմացությունն» է եղել:

Սպիտակ տանը ֆոտոշարքի ժամանակ լրագրողներն ԱՄՆ նախագահին և Գերմանիայի կանցլերին խնդրել են իրար ձեռք սեղմել: «Պարո՛ն նախագահ, մենք կարո՞ղ ենք իրար ձեռք սեղմել»,- դիմել է Մերկելը Թրամփին, բայց վերջինս ոչ մի կերպ չի արձագանքել նրա հարցին:

Շատ ԶԼՄ-ներ եզրակացրին, որ Թրամփը գիտակցաբար է անտեսել Մերկելին, և նրան կոշտ քննադատության են ենթարկել: Իսկ Spiegel-ը նշում է, որ Սպիտակ տունը, մեկնաբանելով իրավիճակը, առաջին անգամ փորձում է փարատել երկու ղեկավարների առաջին հանդիպման մասին տհաճ տպավորությունը:

Թրամփն իր թվիթերյան էջում գրել է, որ Մերկելի հետ հրաշալի հանդիպում է ունեցել: Նա Facebook-ում հրապարակել է լուսանկար, որում սեղմում է Մերկելի ձեռքը մամուլի ասուլիսին մոտենալու ժամանակ: