Սիրիան Թուրքիայի զինուժի ագրեսիայի կապակցությամբ դիմել է ՄԱԿ-ի գլխավոր քարտուղարին և ԱԽ-ին
20:48 , 10 մարտ, 2017
Սիրիայի ԱԳ նախարարությունը «Սիրիայի ինքնիշխանության դեմ թուրքական զորքերի շարունակվող ոտնձգությունների» կապակցությամբ ուղերձ է հղել ՄԱԿ-ի գլխավոր քարտուղարին և համաշխարհային կազմակերպության Անվտանգության խորհրդին, տեղեկացնում է SANA գործակալությունը:
«ՄԱԿ-ի Անվտանգության խորհուրդը պետք է կանգնեցնի Թուրքիայի ագրեսիվ գործողությունները և պահպանի անվտանգությունն ու կայունությունը տարածաշրջանում»,-ընդգծվում է ուղերձում:
Սիրիայի արտաքին քաղաքական գերատեսչությունում նաև նշել են, որ թուրքական զորքերի գործողությունների հետևանքով զոհվել են «տասնյակ հազարավոր անմեղ մարդիկ և ոչնչացվել են ենթակառուցվածքներ»:
Հիշեցնենք, որ մարտի 9-ին թուրքական զորքերը հրետակոծել են սիրիացի սահմանապահների դիրքերը Մանբիջ քաղաքից արևմուտք ընկած շրջանում: Ինչպես նշվել էր Սիրիայի զինված ուժերի հրամանատարության հայտարարության մեջ, հրետակոծման հետևանքով սիրիացի զինծառայողների շարքերում կան սպանվածներ ու վիրավորներ: