Գլենդելի ավագանու ընտրությունների հայ թեկնածուները

 10 թեկնածուներ պայքարում են Գլենդելի քաղաքային խորհրդի 3 թափուր աթոռների համար, որոնցից 1-ը ազատվել էր, երբ նախկին քաղխորհրդի անդամ Լորա Ֆրիդմանն անցած նոյեմբերին ընտրվել էր նահանգային ժողովում։ Այս մասին հայտնում է Glendale New-Press-ը։ Ավագանու ընտրությունները տեղի կունենան ապրիլի 4-ին։

Թեկնածուների թվում են պաշտոնյաներ Արա Նաջարյանն ու Զարե Սինանյանը։

 Նաջարյանը, ով երեք անգամ զբաղեցրել է Գլենդելի քաղաքապետի պաշտոնը և ներկայում հանդիսանում է Metro Transportation Authority կորպորացիայի խորհրդի անդամ, ասել է, որ ցանկանում է երկարացնել խորհրդում իր 12 տարվա ներկայությունը որպես գերզարգացման հակառակորդ՝ միևնույն ժամանակ ցանկանալով բարելավել տրանսպորտի ու բիզնեսի ոլորտը։

Սինանյանը, ով մեկ ժամկետ պաշտոնավարել է որպես քաղաքապետ՝ 2013 թվականին խորհրդում առաջին անգամ ընտրվելուց հետո, քարոզարշավի հայտարարությունում ասել է, որ իր քաղաքականությունը բարելավել է կյանքի որակը Գլենդելում՝ շնորհիվ մատչելի բնակարանային ծրագրերի։

Քաղխորհրդում առկա թափուր տեղերի համար պայքարում են այլ հայեր ևս։

Վրեժ Աղաջանյանը 34 տարի Գլենդելի բնակիչ է և քաղաքական հարցեր է քննարկում տեղական թոք շոուում շուրջ երկու տասնամյակ։ Մասնագիտությամբ ինժեներ Աղաջանյանն իր թեկնածությունն է առաջադրել մի քանի պատճառներով, որոնց թվում է կառավարության աշխատանքի թափանցիկության և փոքր բիզնեսի համար աջակցության հասնելը։

Օնիկ Մեհրաբյանն ավտոդիլերային կենտրոնի սեփականատեր է և նախկինում եղել է քաղաքի տրանսպորտի հարցերով հանձնաժողովի անդամ։ Նրա քարոզարշավն ուղղված է կառավարության թափանցիկ աշխատանքին, տեղի բիզնեսի աջակցմանն ու քաղաքի կանաչ տարածքների պահպանությանը։

Քաղխորհրդի քարտուղար Արդի Քասախյանն ու գանձապահ Ռաֆի Մանուկյանն ընտրություններին կմասնակցեն այլընտրանքային հիմքով։