Իրանում պետական երկաթուղային ընկերության ղեկավարը հրաժարական է տվել խոշոր վթարից հետո
20:00 , 27 նոյեմբեր, 2016
France Presse լրատվական գործակալության փոխանցմամբ՝ Իրանի տրանսպորտի փոխնախարար, պետական երկաթուղային ղեկավար Մոհսեն Փուրը հրաժարական է տվել։
Դա տեղի է ունեցել Սեմնան նահանգում մարդատար գնացքների բախումից հետո։ Ավելի վաղ հաղորդվել էր վթարի կապակցությամբ ընկերության չորս աշխատակիցների ձերբակալման մասին։
Մոհսեն Փուրն իր հրաժարականը որակել է որպես հասարակության առջև ունեցած պատասխանատվության դրսևորման ժեստ։ Նա հավելել է, որ նախնական տվյալներով՝ միջադեպը տեղի է ունեցել մարդկային գործոնի պատճառով։
Երկաթուղային վթարը ուրբաթ գրանցվել է Իմամշեհր երկաթուղային կայարանում։ Այստեղ գնացքներից մեկն ընթացքի ժամանակ մխրճվել է կայարանում կանգնած գնացքի մեջ։
Բախման հետևանքով 4 վագոն դուրս է եկել ռելսերից, ևս երկուսը այրվել են։ Տեղի իշխանությունների պնդմամբ՝ հարված հասցրած գնացքում գտնվել է 400 մարդ։ Վերջին տվյալներով՝ երկաթուղային վթարի հետևանքով զոհվել է 45 մարդ։