Պեսկով. Մոսկվան անհրաժեշտ ամեն ինչ անում է՝ ՆԱՏՕ-ի ընդլայնման ֆոնին իր անվտանգությունն ապահովելու համար

16:52 , 22 նոյեմբեր, 2016

Մոսկվան իրավունք ունի իր տարածքում անհրաժեշտ բոլոր միջոցները ձեռնարկել՝ ի պատասխան այնպիսի ագրեսիվ բլոկի ընդլայնման, ինչպիսին ՆԱՏՕ-ն է:

ՌԻԱ Նովոստիի փոխանցմամբ՝ այս մասին հայտարարել է ՌԴ նախագահի մամուլի խոսնակ Դմիտրի Պեսկովը:

«Ռուսաստանն անում է անհրաժեշտ ամեն ինչ, որպեսզի ՆԱՏՕ-ի կողմից իր սահմաններին ընդլայնման ֆոնին ապահովի իր անվտանգությունը: ՆԱՏՕ-ն իսկապես ագրեսիվ բլոկ է: Այս դեպքում, իհարկե, Ռուսաստանն ինքնիշխան բոլոր իրավունքներն ունի՝ Ռուսաստանի Դաշնության ամբողջ տարածքում անհրաժեշտ միջոցներ ձեռնարկելու համար»,- ասել է Պեսկովը:

Նա մեկնաբանել է արեւմտյան լրատվամիջոցների հրապարակումներն այն մասին, որ Կալինինգրադում նոր հրթիռային համակարգերի տեղակայումն Արեւելյան Եվրոպայում ՆԱՏՕ-ի ընդլայնման պատասխան են: Միաժամանակ, Պեսկովը չի պատասխանել հարցին, արդյո՞ք այդ համակարգերն արդեն Կալինինգրադում են եւ արդյոք այնտեղ մշտական հիմունքով են տեղակայվում: