Ադրբեջանի 2017 թվականի պետբյուջեի նախագիծը կլինի վերջին 10 տարում ամենավատ նախագծերից մեկը. փորձագետ

Ադրբեջանական Turan լրատվական գործակալության փոխանցմամբ՝ 2017 թվականի Ադրբեջանի պետբյուջեի նախագիծը կլինի վերջին 10 տարում բյուջեի ամենավատ նախագծերից մեկը։ Այդ մասին հաջորդ տարվա պետբյուջեի նախագծի հասարակական քննարկումների ժամանակ հայտարարել է հանրահայտ տնտեսագետ Գուբադ Իբադօղլուն։

Նրա խոսքերով՝ քննարկումներին մասնակցելու հրավերներ են ուղարկվել պատգամավորների 1/3-ին, սակայն նրանցից ոչ ոք չի եկել և անգամ պրոֆիլային հանձնաժողովի անդամները։ Իբադօղլուն հայտարարել է, որ մինչև տարեվերջ մնացել է մեկուկես ամիս, սակայն պետբյուջեի մասին օրենքների փաթեթը ներկայացված չէ խորհրդարանին։

Խոսելով կոնկրետ պետբյուջեի մասին՝ փորձագետն ընդգծել է, որ այն կազմում է 9 միլիարդ դոլարից քիչ ավելի, ինչը բավական ցածր ցուցանիշ է վերջին 10 տարվա համար։ Նա համեմատության համար հիշեցրել է, որ ամենաբարձր ցուցանիշը գրանցվել է 2013 թվականին՝ 25 միլիարդ դոլար.
«Ներկայիս ցուցանիշները վկայում են, որ Ադրբեջանը ոչ թե զարգանում է, այլ հետընթաց է ապրում։ Կարծում եմ, որ բյուջեի 38 տոկոսը կձևավորվի նավթային եկամուտների, 45 տոկոսը՝ հարկերի, 14 տոկոսը՝ մաքսատուրքերի, 3 տոկոսը՝ այլ ոլորտների հաշվին»։