Ադրբեջանում ամեն օր 138 մարդ դառնում է գործազուրկ

Lurer.com-ը գրում է.

Ադրբեջանում տնտեսական ճգնաժամի պատճառով ամեն օր միջինը 138 մարդ զրկվում է աշխատանքից:

Այս մասին հայտնում է ադրբեջանական azadliq.info լրատվական գործակալությունը:

Ադրբեջանի վիճակագրության պետական կոմիտեի հաղորդմամբ՝ 2016 թվականի հունվար-հոկտեմբերին այդ երկրում փակվել է 37,2 հազար աշխատատեղ:

Փակված աշխատատեղերի 76,2 տոկոսը բաժին է հասել մասնավոր հատվածին:

Ադրբեջանում լայն թափ է ստացել պետական հիմնարկություններում հաստիքների կրճատման եւ միավորման գործընթացը:

Ադրբեջանի փորձագիտական շրջանակների կարծիքով, այս գործընթացը կշարունակվի նաեւ 2017 թվականի ընթացքում:

Ադրբեջանական փորձագետների հաղորդմամբ՝ Ադրբեջանի պետական բյուջեն գտնվում է ծանր վիճակում, պետությունը կրճատումներ եւ լուծարումներ իրականացնելով փորձում է կրճատել բյուջեի ծախսերը:

2016 թվականի 10 ամսում Ադրբեջանի պետական բյուջեի մուտքերի եւ ծախսերի միջեւ ճեղքվածքը կազմել է 364,3 մլն մանաթ: