Սիրիական բանակը վերադարձրել է վերահսկողությունը Հալեպի արևմտյան Ալ-Ասադ թաղամասի նկատմամբ

Սիրիայի կառավարական զորքերը ժողովրդական աշխարհազորի ջոկատների հետ համատեղ վերադարձրել են վերահսկողությունը հոկտեմբերի վերջին զավթված Հալեպի արևմտյան Ալ-Ասադ թաղամասի նկատմամբ։ Այս մասին RIA Novosti-ին հայտնել է լիբանանյան «Հըզբոլլահ» շարժմանը մոտ աղբյուրը։

«Բանակն ու աշխարհազորայինները դուրս են մղել ահաբեկիչներին Ալ-Ասադ թաղամասից։ Տարածքների մաքրումը դեռևս շարունակվում է, հավանաբար գրոհայինները հեռանալիս հասցրել են ականապատել տների կամ փողոցների մի մասը»,-ասել է գործակալության զրուցակիցը։

Հալեպի ազգային աշխարհազորում հայտնել են, որ կատաղի մարտերը շարունակվում են թաղամասի մատույցներում։

Ավելի վաղ հայտնի էր դարձել, որ սիրիական բանակը, «Հըզբոլլահի» մարտիկներն ու ազգային աշխարհազորի ջոկատները դուրս են մղել ահաբեկիչներին Մինյան գյուղից, որը գտնվում է Ալ-Ասադ թաղամասի հարևանությամբ։ «Հըզբոլլահը» ահաբեկչական խմբավորումների դեմ մարտնչում է սիրիական ճգնաժամի գրեթե ամենասկզբից։