Փոփոխությունների ալիքը շարժվելու է դեպի մարզեր

Պետական կառավարման համակարգում ակտիվ վերադասավորումներ են տեղի ունենում: Առաջին հերթին սա արտահայտվում է կառավարության կազմում տեղի ուենցած փոփոխություններով: Հին նախարարներից շատերը չվերանշանակվեցին, իսկ նրանց փոխարինեցին լիովին նոր մարդիկ, այն էլ` մասնավոր սեկտորի ներկայացուցիչներ:

Ելնելով մամուլում շրջանառվող տեղեկություններից, ենթադրվում է, որ տեղի ունեցող գործընթացները միայն գերատեսչությունների ղեկավարների փոփոխություններով չի սահմանափակվելու, փոփոխություններ են լինելու նաև միջին օղակներում` այդ թվում նաև մարզպետարաններում: Անգամ տեղեկություններ են շրջանառվում, որ որոշ մարզպետներ հնարավոր է լքեն իրենց պաշտոնները:

Գաղտնիք չէ, որ մարզպետարաններում, բազմաթիվ տեղական իշխանության մարմիններում պետբյուջեից հատկացված գումարները փոշիացվում են և չեն ծառայում իրենց նպատակին, իսկ երկրի ընդհանուր տնտեսական առաջընթացը և տարածքային համաչափ զարգացումը կախված են նաև մարզերի ընդհանուր վիճակից: Ուստի անհրաժեշտ է ուշադրություն դարձնել այս հանգամանքի վրա՝ խստացնելով վերահսկողությունը մարզպետարանների աշխատանքների վրա: