ԱՄՆ Կապիտոլիումում նշել են Հայաստանի անկախության տոնը

ԱՄՆ Ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսը, սենատոր Ռոբերտ Մենենդեսը, Կոնգրեսի հայկական հարցերով հանձնախմբի անդամները Կապիտոլիումում մասնակցել են Հայաստանի Հանրապետության անկախության 25-րդ տարեդարձին նվիրված արարողությանը: Հայ դատի ԱՄՆ հանձնախմբի տեղեկացմամբ՝ միջոցառումը կազմակերպել էր Միացյալ Նահանգներում Հայաստանի դեսպանատունը:

Ամերիկացի օրենսդիրները ջերմորեն շնորհավորել են Հայաստանին քառորդ դարյա անկախության առթիվ` խոստանալով շարունակական համագործակցություն հայ-ամերիկյան հարաբերությունների հետագա զարգացման, Արցախի անկախության գործընթացին աջակցելու և Հայոց ցեղասպանության ճանաչման հարցերում:

Միջոցառմանը ելույթով է հանդես եկել ԱՄՆ-ում Հայաստանի դեսպան Գրիգոր Հովհաննիսյանը, ով առաջարկել է օրենսդիրներից յուրաքանչյուրին իր ողջույնի խոսքն ասել պատմական իրադարձության վերաբերյալ:

Հայ դատի ԱՄՆ հանձնախմբի ղեկավար Արամ Համբարյանը մեծապես կարևորել է ԱՄՆ աջակցությունը Հայաստանի անկախության ձեռքբերման և կայացման գործում: Նա ընդգծել է հայ ժողովրդի հանձնառությունը տարածաշրջանում խաղաղության հաստատման հարցում` հիշեցնելով, որ Երևանն ու Ստեփանակերտը կողմ են հրադադարի ռեժիմի ամրապնդմանն ուղղված Ռոյս-Էնգել առաջարկին: Համբարյանը հիշեցրել է նաև միջազգային խաղաղարար առաքելության ոլորտում Հայաստանի ունեցած մասնակցության, միջուկային անվտանգության մարտահրավերների հարցով ԱՄՆ հետ համագործակցության, ինչպես նաև սիրիական ճգնաժամում Հայաստանի առաջնորդության մասին: