Ռուհանին կմեկնի Վենեսուելա և Կուբա
10:50 , 13 սեպտեմբեր, 2016
Իրանական IRNA լրատվական գործակալության փոխանցմամբ՝ Իրանի նախագահ Հասան Ռուհանին ծրագրում է ուրբաթ մեկնել Վենեսուելա՝ մասնակցելու Չմիավորման շարժման գագաթնաժողովին, որն անցկացվելու է լատինաամերիկյան երկրում: Այս մասին հայտարարել է Իրանի նախագահի աշխատակազմի՝ հասարակության հետ կապերի բաժնի պետ Փարվիզ Էսմայիլին:
Նրա խոսքով՝ Ռուհանին Չմիավորման շարժման նախագահությունը կփոխանցի Վենեսուելայի նախագահ Նիկոլաս Մադուրոյին:
«Իրանի նախագահը գագաթնաժողովի շրջանակներում նաև կհանդիպի ու խորհրդակցություններ կանցկացնի մի շարք երկրների ղեկավարների հետ:
Չմիավորման շարժման գագաթնաժողովից հետո Իրանի նախագահը իր կուբացի գործընկեր Ռաուլ Կաստրոյի պաշտոնական հրավերով Վենեսուելայից կմեկնի Հավանա: Նախագահը ծրագրում է հանդիպել նաև Ֆիդել Կաստրոյի հետ»,- տեղեկացրել է նա:
Իրանի նախագահը Հավանայից կմեկնի Նյու Յորք, որտեղ և կմասնակցի ՄԱԿ ԳԱ-ի 71-րդ նստաշրջանին: