Հոգեկան և թերապևտիկ հիվանդությունների պատճառով վաղաժամկետ զորացրվածների թիվը նվազել է. ՀՀ ՊՆ

Artsakhpress.am-ը գրում է.

ՀՀ պաշտպանության նախարարության վարչական համալիրում օգոստոսի 4-ին քննարկվել և ամփոփվել են 2016 թ. առաջին կիսամյակի ընթացքում ՊՆ Կենտրոնական ռազմաբժշկական հանձնաժողովի կողմից կատարված աշխատանքները:

Ինչպես տեղեկացրին ՀՀ պաշտպանության նախարարության տեղեկատվության եւ հասարակայնության հետ կապերի վարչությունից, խորհրդակցության ընթացքում  ՀՀ պաշտպանության նախարար Սեյրան Օհանյանը ԿՌԲՀ անդամներին շնորհակալություն է հայտնել համատեղ և արդյունավետ աշխատանքի համար՝ ընդգծելով, որ վերջին տարիներին արվել է ամենայն հնարավորը հանձնաժողովի գործունեությունը կանոնակարգելու, այն առավել բաց և թափանցիկ հիմքերի վրա դնելու համար՝ հատկապես զորակոչի գործընթացի շրջանակում ռազմաբժշկական օղակում կոռուպցիոն ռիսկեր պարունակող երևույթները խստագույնս վերահսկելու առումով:

Ներկայացնելով 2016 թվականի առաջին կիսամյակում կատարված աշխատանքների հաշվետվությունը՝ ԿՌԲՀ պետ Սահակ Օհանյանը, ըստ առաձնին ուղղությունների, հանգամանալից անդրադարձ է կատարել իրականացված միջոցառումներին: Ընդգծվել է, որ հոգեկան և թերապևտիկ հիվանդությունների առումով հաշվետու ժամանակահատվածում նկատվել է վաղաժամկետ զորացրվածների ընդհանուր թվի նվազում:

Խորհրդակցության ընթացքում նաև ակտիվ քննարկումներ են ծավալվել՝ նվիրված զինծառայողների և զորակոչիկների հետտրավմատիկ սթրեսային խանգարումներին, հոգեբուժական խնդիրներին,  դրանց վաղ հայտնաբերման և բուժման հարցերին:  Այս առնչությամբ ռազմաբժշկական օղակի պատասխանատու ստորաբաժանումների ներկայացուցիչների կողմից հնչել են համապատասխան առաջարկություններ: