Անհնար է կրոնական կառույց անվանել Ֆեթուլահ Գյուլենի ահաբեկչական կազմակերպությունը. Թուրքիայի կրոնական հարցերով վարչության ղեկավար

Թուրքական Anadolu լրատվական գործակալության փոխանցմամբ՝ Թուրքիայի կրոնական հարցերով վարչության ղեկավար Մեհմեթ Գյորմեզը Կրոնական խորհրդի արտահերթ նիստի ժամանակ հայտարարել է, որ անհնար է կրոնական կառույց անվանել FETÖ (Ֆեթուլահ Գյուլենի) ահաբեկչական կազմակերպությունը.

«FETÖ-ն բազմաթիվ տարիներ շահագործել է կրոնական զգացմունքները, փորձել է խեղաթյուրել մեր կրոնի հիմնական արժեքները և հայեցակարգը, հակաիսլամական ու անբարոյական գործողությունների, սադրանքների ու կեղծիքի օգնությամբ հավաքագրել է կողմնակիցների ու ընդլայնել իր հնարավորությունները՝ ներթափանցելով պետական բոլոր կառույցները։

FETÖ-ն փորձել է պատանդ վերցնել ազգի ապագան և նրա իրականացրած հեղաշրջման փորձի ժամանակ բացահայտվել է ժողովրդի կողմից։ Անհնար է այդ կազմակերպության ղեկավարին ընկալել որպես կրոնական գործիչ»։

Թուրքիայի Կրոնական խորհուրդը հավաքվում է 5 տարին մեկ ։ Վերջին անգամ այն հավաքվել էր 2014 թվականին։