Կրեմլն արձագանքել է Ռուսաստանի դեմ սրբազան պատերազմ սկսելու իսլամիստներին սպառնալիքներին
16:56 , 1 օգոստոս, 2016
Araratnews.am-ը գրում է․
Մոսկվան հարկ եղած ուշադրությամբ է վերաբերվում սպառնալիքներին, որոնք հնչեցվել են Ռուսաստանում արգելված «Իսլամական պետություն» ահաբեկչական կազմակերպության տարածած տեսանյութում` ՌԻԱ «Նովոստի»-ի փոխանցմամբ հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Նման հրապարակումները հաշվի են առնվում հատուկ ծառայությունների կողմից, որոնք պատասխանատու են հակաահաբեկչական աշխատանքի և անվտանգության ապահովման համար։ Հավանաբար անհրաժեշտ միջոցառումներ կձեռնարկվեն պաշտպանության նախարարության գծով Սիրիայում ռուսական ռազմատիեզերական ուժերի գործողության իրականացման ընթացքում»,- հայտարարել է Պեսկովը։
Նա նաև նշել է, որ նման սպառնալիքները չեն կարող ազդել ահաբեկչության դեմ պայքարում ՌԴ նախագահ Վլադիմիր Պուտինի քաղաքականության վրա, որը կշարունակվի բոլոր ուղղություններով։ Կրեմլի ներկայացուցիչը հավելել է, որ չպետք է նաև չափազանցել նման սպառնալիքները։
Հիշեցնենք, որ իսլամիստ ահաբեկիչները կոչ են արել Ռուսաստանի դեմ սրբազան պատերազմ` ջիհադ, սկսել և սպանել նախագահ Պուտինին: