ԵՏՄ նոր նախագծով ՀՀ քաղաքացիները կկարողանան վարկ վերցնել միության այլ երկրների բանկերից

12:20 , 18 հուլիս, 2016

ԵՏՄ երկրները մտադիր են փոխանակել վարկային պատմությունների քաղվածքները: Դա հնարավորություն կտա ռուսաստանցիներին վարկ ստանալ ԵՏՄ անդամ երկրներում, իսկ ԵՏՄ երկրների, այդ թվում Հայաստանի, քաղաքացիներին` ՌԴ-ում: Սակայն նախագիծն իրականացնելը հեշտ չի լինի շուկայի մասնակիցների հետաքրքրության բացակայության, օրենսդիր հակասությունների և տեխնիկական խնդիրների պատճառով, հայտնում է «Կոմերսանտը»:

Նախորդ շաբաթ աշխատանքային խումբը քննարկել է համաձայնագրի նախագիծը: Եվրասիական տնտեսական հանձնաժողովի մամուլի ծառայությունը պարզաբանել է, որ փաստաթուղթը մշակվում է ԵՏՄ ազգային բանկերի ակտիվ մասնակցությամբ: «Համաձայնագիրը պետք է լուծի առկա խնդիրները, ոչ խտրական պայմաններ ստեղծի ԵՏՄ անդամ երկրների քաղաքացիների և ձեռնարկատիրության համար` վարկավորման հարցերով ֆինանսական հաստատություններ դիմելիս»,-ասել են ԵՏՀ-ում: Այլ կերպ ասած, ռուսաստանցիները կկարողանան վարկ ստանալ Բելառուսում, Հայաստանում, Ղազախստանում, Ղրղզստանում, իսկ այդ երկրների բնակիչները` ռուսական բանկերում:

Ըստ ՌԴ «Խնայբանկի» գլխավոր վերլուծաբան Միխայիլ Մատովնիկովի, գաղափարը կառուցողական է: «Եթե վարկառու օտարերկրացին վարկ ստանա ու չվերադարձնի ԵՏՄ երկրում, ապա հայրենիքում վարկ ստանալիս խնդիրներ կունենա վատ վարկային պատմության պատճառով»:

Սակայն, եթե նույնիսկ շուկայի անդամներին հետաքրքրի գաղափարը, համաձայնագիրը դժվար կլինի իրականացնել օրենսդրական արգելքների պատճառով, առնվազն, Ռուսաստանում: