«ԲարՔեմփ Երևան 2016». հայ երիտասարդների մեծ հետաքրքրությունը միջոցառման հանդեպ

Հայաստանի ամերիկյան համալսարանում  այսօր մեկնարկեց «ԲարՔեմփ Երևան 2016» 8-րդ չկոնֆերանսը: Երկօրյա չկոնֆերանսի հանդեպ հետաքրքրությունը տարեցտարի աճում է։ 2009 թվականին առաջին «ԲարՔեմփին» մասնակցում էր 400 մարդ, այս տարի մասնակիցների թիվն անցել է 3000-ը։

«Ակնհայտ է, որ տարեցտարի աճում է հետաքրքրվողների քանակը։ Միայն օնլայն հարթակում 3000 մարդ է գրանցվել, ընդ որում՝ մասկնակցության համար պետք էր հայտ լրացրել, որ թե ուղղակի մի քլիք անել, որ մտածենք ուղղակի է հայտագրվել։ Փորձը ցույց է տալիս, որ բուն միջոցառմանն ավելի շատ մարդ է գալիս, քան գրանցվել է։ Դա արդեն իսկ երևում է, սենյակներ մտնել չի լինում։ Քանի որ թեմաների շրջանակը լայն է՝ տեղեկատվական տեխնոլոգիաներ, մեդիա, մարդկանց շրջանակը ևս լայն է»,- BlogNews-ի հետ զրույցում ասաց տեղեկատվական անվտանգության փորձագետ Սամվել Մարտիրոսյանը։

Ըստ նրա՝ «ԲարՔեմփ»-ը մարդկության և ապագայի նկատմամբ հույսը կորցրածները «Բարքեմփ»-ում կարող են լիցքավորվել:

Սամվել Մարտրոսյանն իր պրեզենտացիայի ժամանակ խոսեց այն մասին, թե ինչպես են մարդիկ դառնում տեղեկատվական գերհոսքերի և մանիպուլացիաների զոհ. «Փաստացի, մարդկությունը որակապես նոր ժամանակշրջան է մտնում, որտեղ կարևոր է լինելու ոչ միայն մարդու ունակությունը՝ ավանդական գիտելիքներով հարմարվել կյանքին, այլև տեղեկատվության հետ աշխատելը, այն մարսելը»։

Այս տարի «Բարքեմփում» նկարահանում և օնլայն հեռարձակնում են բոլոր սենյակների պրեզենտացիաները, այնպես որ մասնակիցները բացթողածները լրացնելու հնարավորություն ունեն։

«ՊանԱրմենիան Մեդիա գրուպի» ինտերնետ ներկայության բաժնի ղեկավար Հասմիկ Ալավերդյանը խոսեց ժամանակակից ինտերնետ օգտատերերի և ինտերնետի վերահսկման մասին։ «Մենք տեսնում ենք ինտերնետը որպես մեծ ենթակառուվածք, սակայն չենք  տեսնում այն կառույցները, որոնք աշխատացնում են ինտերներտը, որոշումներ են կայացնում հետագա զարգացումների միտումների վերաբերյալ։ Ես ներկայացրի, թե ինչպես է ստեղծվել ինտերնետը, ինչ դեր ունեն ԱՄՆ-ը և այնտեղ հիմնադրված կորպորացիաները, ինչպես են ղեկավարվում տեխնիկական էլեմենտները, առանց որոնց ինտերնետի գոյությունն անհնար է։ Համացանցի վերահսկողության մասով աշխարհն այսօր բաժանվել է 2 մասի՝ լիբերալ և վերահսկող։ Ռուսաստանն ու Չինաստանը հիմնական պետություններն են, որոնք փորձում են մեծացնել իրենց դերն ինտերնետի կառավարման հարցերում և իրենց երկրի տարածքում վերահսկում են հաղորդակցության ցանցերը»,- ասաց նա ու հավելեց, որ Հայաստանը լիբերալ երկրների շարքում է, քանի որ չի ստորագրել այն փաստաթուղթը, որի համաձայն ինտերնետը պետք է վերահսկվեր, գրաքննվեր։ Հասմիկը նշեց, որ տարածաշրջանում այդպիսի կողմնորոշում ունի նաև Վրաստանը, իսկ Ադրբեջանն ու Թուրքիան ստորագրել  են վերահսկման փաստաթուղթը։

«Yandex Taxi»-ի մարքետինգի գծով տնօրեն Դանիլ Շիլեյկոն ներկայացրեց իրենց  օնլայն տաքսին, որը Երևանում կգործի հուլիսի 1-ից։ Այն շուկայում հանդես կգա այնպիսի նոր առաջարկներով, որպիսիք Հայաստանում դեռ չեն եղել։

Անդրադառնալով «Բարքեմփին»՝ Շիլեյկոն նշեց, որ շատ ուրախալի է հայ երիտասարդության ակտիվությունը։ Նա նկատե, որ Մոսկվայում ևս կազմակերպվում են «Բարքեմփներ», սակայն ռուս երիտասարդներն այսքան ակտիվորեն չեն մասնակցում միջոցառումներին։

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի