Անարդարություններ պարունակող նախագիծ էր. քաղաքագետը՝ Բունդեսթագի ընդունած Հայոց ցեղասպանության ճանաչման բանաձևի մասին

Tert.am–ը գրում է.

Քաղաքագիտության դոկտոր Հայկ Մարտիրոսյանը կարծում է, որ Գերմանիայի Բունդեսթագի կողմից ընդունված Հայոց ցեղասպանության վերաբերյալ բանաձևը շատ թույլ փաստաթուղթ է, որտեղ կան սխալ ձևակերպումներ և որտեղ «Ցեղասպանություն» բառը հիշատակվում է միայն վերնագրում և տեքստի այն հատվածում, որտեղ խոսք կա այլ ցեղասպանությունների մասին և ոչ թե առանձին Հայոց ցեղասպանություն անունով:

Ըստ նրա՝ նման բովանդակությամբ, ձևակերպումներով բանաձև սպասելի էր, որ կընդունվի:

«Իրականում պետք է հասկանալ, որ լավ է, որ ինչ-որ բան ընդունվել է, բայց նախագիծը, կարելի է ասել, անարդարություններ պարունակող նախագիծ էր»,-ասաց նա:

Հիշեցնենք, որ այսօր Բունդեսթագի պատգամավորները գրեթե միաձայն ընդունեցին Հայոց ցեղասպանության վերաբերյալ բանաձևը:

Հայկ Մարտիրոսյանը մեզ համար ցանկալի ձևակերպումներով բանաձևի ընդունումը հնարավոր չհամարեց, որովհետև Գերմանիայում կա հսկայական թուրք բնակչություն և այդ ձևակերպումները կարող են նյարդայնացնել իրենց, ինչն ըստ քաղաքագետի՝ հավերժական արգելք է, որպեսզի Գերմանիան կարողանա արդար, ուժեղ բովանդակությամբ նախագիծ ընդունել:

Քաղաքագետն ասաց, որ թեև  բանաձևի ընդունումը զրո կետից տեղաշարժ է, բայց չգիտի, արդյո՞ք նման առաջընթացով պետք է ուրախանալ կամ ընդհանրապես համարել դա առաջընթաց՝ հաշվի առնելով, որ բանաձևում  պատասխանատվություն չի դրվում Թուրքիայի վրա, կոչ չի արվում, որ Թուրքիան ճանաչի Ցեղասպանությունը, և առանցքային հարցերը սխալ են ներկայացված կամ ընդհանրապես ներկայացված չեն:

Ինչ վերաբերում է թուրք-գերմանական հարաբերություններին այս բանաձևի
անդրադարձին, Հայկ Մարտիրոսյանն ասաց, որ կարծում է՝ դրանք չեն տուժի: «Որոշ ժամանակով ինչ-որ ձևեր կանի Թուրքիան, այսպես կոչված, պատժիչ, թեթև գործողություններ կձեռնարկի, և միայն այդքանը»,-ասաց նա և նշեց, որ թուրք-գերմանական հարաբերությունները չեն կարող տուժել, որովհետև Թուրքիան հեռահար նպատակներ ունի Գերմանիայի հարցում: