Սեյրան Օհանյանը շնորհակալ է կամավորականներին ՊԲ-ին ցուցաբերած մեծ աջակցության համար

16:16 , 23 մայիս, 2016

ՀՀ պաշտպանության նախարար Սեյրան Օհանյանը շնորհակալ է կամավորներից, ովքեր ինչպես թեժ մարտական գործողությունների օրերին, այնպես էլ այժմ առաջնագծում են:

«Ցանկանում եմ շնորհակալություն հայտնել մեր ժողովրդին, կամավորական շարժմանը, բոլոր կամավորներին, պատերազմի մեր բոլոր մասնակիցներին, իրենց փորձի համադրմամբ մեր այսօրվա առաջին գծում գտնվող բանիմաց, խելացի, գրագետ հրամանատարների և զինվորների հետ մեր առջև դրված մեր երկրի՝ Արցախի պաշտպանության խնդիրը իրականացնելու համար»,- ասաց նախարարը լրագրողների հետ ճեպազրույցում:

Նա նշեց, որ հասարակական կամ այլ կազմակերպությունների հենքի վրա ձևավորված կամավորական ստորաբաժանումները, որոնց ծառայությունն իրականացվել է տարբեր հերթափոխերով, մեծ աջակցություն են ցուցաբերել Պաշտպանության բանակին: «Այդ հերթափոխերն այսօր էլ շարունակվում են: Այն կամավորները, որոնք դեռևս ցանկանում են ներկա գտնվել Պաշտպանության բանակում, նրանք ներկա են»,-նշեց նախարարը` հավելելով, որ կամավորների մի մասն էլ հետ է վերադարձել իր բնականոն կյանքին: