ԱՄՆ բիզնեսի ներկայացուցիչները երկրի նախագահ նախընտրում են տեսնել Քլինթոնին, քան Թրամփին. հարցում

Ամերիկյան բիզնեսի ներկայացուցիչները կնախընտրեին ԱՄՆ նախագահի պաշտոնում տեսնել ավելի շուտ երկրի նախկին պետքարտուղար Հիլարի Քլինթոնին, քան Հանրապետական կուսակցությունից թեկնածու Դոնալդ Թրամփին: Այս մասին գրում է Financial Times-ը՝ հղում անելով իր ուսումնասիրությանը:

Հաղորդվում է, որ թեկնածուներին աջակցության հարաբերակցությունը մոտ երկուսը մեկի է՝ հօգուտ Քլինթոնի: Միաժամանակ, բիզնեսմենների կեսը, որոնք ավանդաբար աջակցում են հանրապետականներին, այս անգամ պատրաստ է իր ձայնը տալ դեմոկրատ Քլինթոնին:

Հարցվածների միայն քառորդ մասն է հայտարարել Թրամփին աջակցելու մասին, որն իր նախընտրական արշավի ընթացքում բազմիցս կտրուկ հայտարարություններով է հանդես եկել բիզնեսի հարցում: Նա առաջարկում է մի շարք առևտրային գործարքներ խզել և ներկրման տուգանքային սակագներ սահմանել: Այն քիչ մասը, որ բիզնեսմեններն ընդունել են նրա ծրագրերում, վերաբերում է կորպորատիվ հարկը 39%-ից մինչև 15% նվազեցնելու առաջարկին: