ՀՀԿ ԳՄ նիստում որոշվել է բացել քաղաքական դպրոց, փոխել կուսակցության ծրագիրը, ավելացնել հանձնաժողովների թիվը ևս մեկով. Էդուարդ Շարմազանով

Tert.am-ը գրում է.

Իշխող Հանրապետական կուսակցությունը Գործադիր մարմնի նիստում ընդունել է ներկուսակցական երեք որոշում: Այս մասին ՀՀԿ ԳՄ նիստից հետո հայտարարեց կուսակցության խոսնակ, ԱԺ փոխնախագահ Էդուարդ Շարմազանովը՝ նշելով, որ նիստը վարել է Հանրապետության նախագահ Սերժ Սարգսյանը:

 

Է. Շարմազանովի փոխանցմամբ՝ Գործադիր մարմնում որոշվել է հիմնադրել քաղաքական դպրոց, ինչպես ընդունված է եվրոպական մի շարք երկրներում: «Քաղաքական առաջադեմ կուսակցություններն ունեն քաղաքական դպրոց: ՀՀԿ-ն որոշել է հիմնել քաղաքական դպրոց, որը կկրի կուսակցության նախկին առաջնորդ, երջանկահիշատակ վարչապետ Անդրանիկ Մարգարյանի անունը»,- նշեց ՀՀԿ խոսնակը:

Էդուարդ Շարմազանովն ասաց, որ կուսակցության ընդունած երկրորդ որոշումը վերաբերում է ՀՀԿ ներսում գործող հանձնաժողովների թիվը մեկով ավելացնելուն: «Գիտեք, որ ՀՀԿ-ում կան հանձնաժողովներ: Կուսակցությունը որոշել է դրանք ավելացնել ևս մեկով՝ ստեղծել արտաքին կապերի հանձնաժողով, ինչը նշանակում է, որ ՀՀԿ-ն մեծ կարևորություն է տալու միջկուսակցական կապերի ամրապնդմանը՝ թե ԵԺԿ-ի, թե առաջին հերթին, բնականաբար, Ռուսաստանի ամենազդեցիկ քաղաքական ուժի՝ «Եդինայա Ռոսիա»-ի հետ»,- մանրամասնեց ԱԺ փոխնախագահը:

Երրորդ որոշումը, Շարմազանովի խոսքով, ՀՀԿ-ի ծրագրի փոփոխության մասին է: Կուսակցության խոսնակը հիշեցրեց, որ սույն տարվա աշնանը ՀՀԿ-ն գումարելու  է համագումար և նշեց, որ դրան ընդառաջ որոշվել է փոփոխություն մտցնել կուսակցության  ծրագրում, քանի որ դրանք 2006թ.-ից՝ շուրջ տասը տարի, մնացել են անփոփոխ: