Հայտնի է դարձել Բրյուսելի օդանավակայանում պայթյուններ իրականացրած մահապարտ ահաբեկիչների ինքնությունը

Բելգիայի ոստիկանությունը պարզել է Բրյուսելի ահաբեկչության երրորդ մասնակցի ինքնությունը, ով փախել է օդանավակայանից՝ պայթյունից անմիջապես հետո։ Պարզվել է, որ տեսախցիկներում հայտնված տղամարդը Նաջիմ Լաաշրաուին է՝ Փարիզի ահաբեկչությունների համար ռումբեր պատրաստողը, հայտնում է The Daily Mail-ը՝ վկայակոչելով բելգիական լրատվամիջոցներին:

Նաջիմ Լաաշրաուին, ով կասկածվում է 130 մարդու մահվան պատճառ դարձած փարիզյան ահաբեկչությունների համար ռումբեր պատրաստելու մեջ, հանգիստ դուրս է եկել Բրյուսելի օդանավակայանից՝ իր հանցակիցների իրականացրած պայթյունից հետո։

Նրա նկատմամբ ավելի վաղ հետախուզում էր հայտարարվել 2015 թվականի նոյեմբերին Փարիզի ահաբեկչություններին ներգրավվածության կասկածանքով։

Նրա հետքերն են հայտնաբերվել նաև Ֆրանսիայի մայրաքաղաքում հայտնաբերված մահապարտների գոտիների վրա, ինչպես նաև բնակարանում, որտեղ իրականացվել է հարձակման նախապատրաստությունը: Հայտնի է նաև, որ Լաաշրաուին որոշ ժամանակ անց է կացրել Սիրիայում, իսկ անցած տարվա սեպտեմբերին մյուս ահաբեկիչ՝ օրերս ձերբակալված Սալահ Աբդեսլամի հետ մեկնել է Հունգարիա:

Ավելի վաղ հայտնի է դարձել, որ ոստիկանությունը պարզել է Բրյուսելի օդանավակայանում իրենց պայթեցրած երկու ահաբեկիչների ինքնությունը: Դրանք եղբայրներ Խալիդ և Իբրահիմ Էլ-Բաքրաուիներն են:

Հիշեցնենք, որ Բրյուսելի միջազգային օդանավակայանում երկու պայթյուն է տեղի ունեցել, ևս մի պայթյուն է տեղի ունեցել մետրոյի «Մալբեկ» կայարանում՝ վագոնում։ Ահաբեկչությունների հետևանքով, ճգնաժամային կենտրոնի տվյալներով, մահացել է 31 մարդ, ևս 250-ը ստացել են վնասվածքներ: Հարձակումների պատասխանատվությունը ստանձնել է «Իսլամական պետություն» ահաբեկչական խմբավորումը: