Բրյուսելում ահաբեկչությունների առնչությամբ փակվել է Ֆրանսիայի և Բելգիայի սահմանը (լուսանկարներ)

Tert.am-ը գրում է.

Բրյուսելում տեղի ունեցած ահաբեկչությունների առնչությամբ փակվել է Ֆրանսիայի և Բելգիայի սահմանը։ Ուժեղացվել են Բելգիայի միջուկային օբյեկտների անվտանգության միջոցառումները, հաղորդում է РИА Новости-ն:

Բացի այդ, The Guardian-ի հաղորդմամբ, դադարեցվել է Բրյուսելի կայարանից դեպի Փարիզ ընթացող բոլոր գնացքների շարժը։

Լրատվամիջոցի հաղորդմամբ՝ լրացուցիչ ռազմական միավորներ են տեղակայվել երկրի վարչապետի գրասենյակի մոտակայքում:

Twitter-ի իր էջում Eurostar-ը հայտնել է, որ չեղյալ է հայտարարվել Բրյուսելի ուղղությամբ բոլոր գնացքների մեկնումը։ Ընկերությունը խորհուրդ է տվել նաև հաճախորդներին չգնալ կայարան:

Հաղորդվում է, որ տեղի ունեցած ահաբեկչական շարքի առնչությամբ ուժեղացվել են Բրյուսելում ՆԱՏՕ-ի գրասենյակի անվտանգության միջոցառումները։ Այդ մասին հայտնել է կազմակերպության ներկայացուցիչը:

Լոնդոնի ոստիկանությունը լրացուցիչ միջոցառումներ է ձեռնարկել քաղաքի կենտրոնում անվտանգության ապահովման համար՝ Բելգիայի մայրաքաղաքում իրականացված ահաբեկչությունների առնչությամբ:

Փարիզի իշխանությունները նույնպես ուժեղացրել են անվտանգության միջոցառումները։