Մեր ծախսերն այնպես կբալանսավորենք, որ ԵՊՀ-ում, կրճատումներ չլինեն. Արամ Սիմոնյան

Tert.am-ը գրում է.

Երևանի պետական համալսարանի ռեկտոր Արամ Սիմոնյանը չի անհանգստանում, որ 2018-ին ուսանողների թվի կտրուկ կրճատման հետևանքով ստիպված են լինելու աշխատավարձեր ու հաստիքներ կրճատել:  Tert.am-ի հետ զրույցում ասաց Երևանի պետական համալսարանի ռեկտոր Արամ Սիմոնյանը:

«Մենք անհանգստանալու բան չունենք, եթե ուսանողների թիվը կրճատվի, հնարավոր է ֆինանսական խնդիրներ լինեն, բայց համալսարանի ֆինանսական վիճակը կայուն է, այնպես չէ, որ հիմա խիստ անհանգստանալու կարիք ունենք, ուղղակի տեսնենք `դիմորդների քանակն ինչպիսին կլինի, ըստ այդմ էլ մեր ծախսերն այնպես կբալանսավորենք, որ կայունությունը չխախտվի»,- ասաց Արամ Սիմոնյանը:

Նշենք, 2017-ին բուհերում մի քանի հազար ուսանողով կրճատվելու է դիմորդների քանակը, քանի որ 2017-ին` 12-ամյա հանրակրթությանն անցնելու պատճառով դպրոցն ավարտելու է 14 700 երեխա, այս տարվա` 24 500-ի փոխարեն: Ինչի կապակցությամբ մի շարք բուհեր արդեն իսկ հայտնել են, որ բուհում կսկսվեն կադրային կրճատումներ, քանի որ աշխատակազմերը ձևավորվել են որոշակի թվով ուսանողի հաշվարկով:

ԵՊՀ ռեկտորը հայտարարեց, որ համալսարանն, առհասարակ, չի գնացել  աշխատավարձերի կրճատումների մեթոդով վերջին 20 տարում:  Իհարկե, եղել են դասախոսներ, որոնք գնացել են թոշակի, սակայն անձնակազմը փոխարինվել է  երիտասարդներով:

«Այսինքն` մենք ֆինանսական դժվարություններից ելնելով` կրճատումներ չենք արել և չենք էլ պատրաստվում: Ավելին` հիմա հավելավճարների նոր համակարգ ենք ստեղծում, որը թույլ կտա առավել աչքի ընկած աշխատակիցներին ավելի լավ վարձատրել, քան նրանց, ովքեր գիտության ոլորտում նվաճումներ չունեն»,- ասաց Արամ Սիմոնյանը:

Դա  միջազգային բուհերում ընդունված բալային համակարգ է, ինչը ներդրված է արևմտյան ու ռուսական շատ բուհերում: