Հավակնորդների մրցաշար. Լևոն Արոնյանը մեկնարկային տուրում ոչ-ոքի խաղաց
22:36 , 11 մարտ, 2016
Times.am-ը գրում է.
Մոսկվայում մեկնարկել է շախմատի աշխարհի չեմպիոնի Հավակնորդների մրցաշարը, որի հաղթողը նոյեմբերին, Նյու-Յորքում մրցելու է աշխարհի գործող չեմպիոն Մագնուս Կարլսենի հետ:
Առաջին տուրում Հայաստանի ուժեղագույն գրոսմայստեր Լևոն Արոնյանը սև խաղաքարերով ոչ-ոքի խաղաց Անիշ Գիրիի հետ: Պարտիան ավարտվեց 65-րդ քայլին:
Մեկնարկային տուրի մյուս պարտիաներում Սերգեյ Կարյակինը ոչ-ոքի խաղաց Պյոտր Սվիդլերի հետ, Հիկարու Նակամուրան միավորը կիսեց Ֆաբիանո Կարուանայի հետ, իսկ Վիշվանաթան Անանդն առավելության հասավ Վեսելին Թոփալովի նկատմամբ:
Վաղը կայանալիք երկրորդ տուրում Արոնյանը սպիտակ խաղաքարերով մրցելու է Անանդի հետ: Սվիդլերը կմրցի Թոփալովի հետ, Կարուանան՝ Գիրիի, իսկ Կարյակինը՝ Նակամուրայի:
Նշենք, որ ՀՀ Նախագահ, Հայաստանի շախմատային ֆեդերացիայի նախագահ Սերժ Սարգսյանը մասնակցել է մրցաշարի պաշտոնական բացման արարողությանը: Նախագահը կատարել է առաջին քայլը Լևոն Արոնյանի մասնակցությամբ շախմատային խաղում: Բացի այդ, Սերժ Սարգսյանը և ՖԻԴԵ-ի նախագահ Կիրսան Իլյումժինովը մրցաշարին զուգահեռ կայծակնային խաղի չնախատեսված պարտիա են անցկացրել, որն ավարտվել է ՀՀ Նախագահի հաղթանակով:
