Վրաստանը չի բացառել 2016թ. Ռուսաստանի հետ վիզայի չեղարկումը

168.am-ը գրում է.

Ռուսաստանի հետ հարաբերությունների կարգավորման հարցով Վրաստանի հատուկ ներկայացուցիչ Զուրաբ Աբաշիձեն չի բացառել, որ արդեն 2016թ. չեղյալ կհայտարարվի երկու երկրների միջև վիզային ռեժիմը, հայտնում է «Իմեդի» հեռուստաալիքը:

Մարտի 16-ին Պրահայում ՌԴ փոխարտգործնախարար Գրիգորի Կարասինի հետ պլանավորված հանդիպումից առաջ Աբաշիձեն հայտարարել է, որ իր ռուս գործընկերոջ հետ կքննարկի արդեն երկու ամիս գործող վիզային ռեժիմի դյուրացման դետալները: Այս մասին հայտնում է RIA Novosti-ն:

«Մենք կքննարկենք այն, թե ինչպես է գործում վիզային ռեժիմը, կա՞ն արդյոք խնդիրներ մեր կողմից ու հարկավո՞ր է ինչ-որ բան անել այդ ուղղությամբ: Վիզային ռեժիմը, իրոք, բավական դյուրացել է ու մենք չենք բացառում, որ այս տարի այն ամբողջությամբ կհանվի»,- հայտարարել է Աբաշիձեն:

Նրա խոսքով՝ օրակարգում դրված են նաև առևտրատնտեսական, տրանսպորտային ու մարդասիրական հարցեր:

Հիշեցնենք, որ ՌԴ ԱԳՆ-ն 2015թ. դեկտեմբերի 23-ից բավական հեշտացրել է Վրաստանի քաղաքացիների համար Ռուսաստան մուտքի արտոնագիր ստանալը: Վրաստանը ՌԴ-ի հետ դիվանագիտական հարաբերությունները խզել է 2008թ. օգոստոսյան ռուս-վրացական պատերազմից հետո: