ՌԴ ԱԳՆ-ն մեկնաբանել է Սավչենկոյի մոտ բժիշկներին թույլ տալու մերժումը

Tert.am-ը գրում է.

ՌԴ ԱԳ նախարար Սերգեյ Լավրովը և Ուկրաինայի արտգործնախարար Պավել Կլիմկինը հեռախոսազրույցի ընթացքում քննարկել են Նադեժդա Սավչենկոյի մոտ ուկրաինացի բժիշկներին թողնելու հարցը:

 

«Կլիմկինին տեղեկացվել է, որ ռուսական կողմը քայլեր էր ձեռնարկել, որպեսզի Սավչենկոյին այցելեն ուկրաինացի բժիշկները, բացառության կարգով, սակայն Սավչենկոյի վրդովեցուցիչ պահվածքը մարտի 9-ին կայացած դատական նիստի ժամանակ և նրա հնչեցրած  վիրավորանքները դատարանի նկատմամբ փոխել է իրավիճակը` անհնար դարձնելով բժիշկների այցելությունը», -  РИА Новости-ի փոխանցմամբ ասվում է ՌԴ ԱԳՆ-ի հաղորդագրության մեջ:

ՌԴ ԱԳՆ-ն որոշում է կայացրել, որ մինչ մարտի 21-ին դատավճռի հրապարակումը  կչեղարկվեն բոլոր տեսակի այցելությունները:  Լավրովն ընդգծել է նաև, որ Սավչենկոյի առողջական վիճակը  մտահոգության տեղիք չի տալիս:

Հիշեցնենք, որ Ռուսաստանում օդաչու Սավչենկոյին մեղադրում են ռուս լրագրողների սպանության համար: Հետաքննության տվյալներով` 2014-ի ամռանը գտնվելով «Այդար» գումարտակի կազմում, Սավչենկոն համակարգել է  ուկրաինական զորքերի հարվածները Լուգանսկի մարզում և հրահանգ է տվել կրակել այն ուղղությամբ, որտեղ գտնվել են ռուս լրագրողները:  Դատախազությունը պահանջում է Սավչենկոյին դատապարտել 23 տարվա ազատազրկման: