Իրանը հունվարից ի վեր ԱՄՆ է արտահանել 32 տոննա ծանր ջուր. AP
11:54 , 9 մարտ, 2016
Իրանն ընթացիկ տարվա հունվարից ի վեր ԱՄՆ է արտահանել 32 տոննա ծանր ջուր, որն օգտագործվել է համապատասխան տիպի միջուկային ռեակտորներում: Այս մասին հայտնում է Associated Press գործակալությունը՝ վկայակոչելով իրանական ԶԼՄ-ները։
Իրանի արտաքին գործերի փոխնախարար Աբաս Արաղչին հայտարարել է, որ ծանր ջրի պաշարները «վաճառվել են» ԱՄՆ-ին՝ հաղորդել է ISNA գործակալությունը: Գործարքի ֆինանսական հատվածի մասին նա չի հիշատակել: Նա նաև չի ասել, թե ինչու են պաշարներն արտահանվել միայն ԱՄՆ, այլ ոչ թե «վեցյակի» այլ երկրներ, որոնք մասնակցել են իրանական միջուկային ծրագրի շուրջ գործարքի կնքմանը:
Իրանը ծանր ջուր է արտադրում Արաքի միջուկային ռեակտորի համար: Սակայն իր միջուկային ծրագրի սահմանափակման վերաբերյալ համաձայնագրին համապատասխան՝ Թեհրանն օբյեկտի վերակառուցում է սկսել։