Թուրքական ոստիկանությունում տագնապ է. Ստամբուլում հարձակումները հաջորդել են միմյանց

Tert.am-ը գրում է.

Ստամբուլի Բայրամփաշա շրջանում ոստիկանական ուժերի վրա երեկ իրականացված հարձակումից հետո քաղաքի շատ շրջաններում ահաբեկչական հարձակումներ են տեղի ունեցել:

Հիշեցնենք, որ ոստիկանատան մոտ նռնակ նետած և հրաձգություն իրականացրած երկու կանայք փախուստի էին դիմել, այնուհետ՝ սպանվել։

Այդ հարձակումից հետո, երեկոյան ժամերին, անհայտ անձինք կրակ են բացել ոստիկանների տեղափոխող ավտոբուսի վրա: Փամփուշտներից մեկը հասել է ուղեկցող մեքենային, ինչի հետևանքով այն բռնկվել է: Դեպքի հետևանքով տուժածներ չկան, հայտնում է sozcu.com.tr-ը։

Երրորդ հարձակման թիրախում եղել է Ֆաթիհ Սուլթան Մեհմեթ համալսարանի ռեկտորին պատկանող մեքենան։ Ժամը 21:00-ի սահմաններում ռեկտորի մեքենայի ուղղությամբ կրակել են ինքնաձիգներից, ինչի հետևանքով վիրավորվել է նրա վարորդը:

Մեկ այլ միջադեպ է տեղի ունեցել Օքմեյդանը շրջանում, այստեղ կրակ են բացել հերթապահություն իրականացնող ոստիկանների զրահապատ մեքենայի ուղղությամբ: Վիրավորներ չկան: Կասկածյալները փախուստի են դիմել ոտքով:

Կրակոցների ձայներ են լսվել նաև Սարըյերում գտնվող ոստիկանական դպրոցի մոտ: Դրանից հետո ոստիկանությունը տագնապ է հայտարարել: