Գալուստ Սահակյանն ընդունել է Կորեայի դեսպանին

Tert.am-ը գրում է.

ՀՀ ԱԺ նախագահ Գալուստ Սահակյանը դեկտեմբերի 15-ին ընդունել է ՀՀ-ում Կորեայի Հանրապետության արտակարգ և լիազոր դեսպան Պակ Նո Փյոկին, տեղեկացնում է ԱԺ մամուլի ծառայությունը:

Ողջունելով նորանշանակ դեսպանին` Գալուստ Սահակյանը շնորհավորել է նրան նշանակման կապակցությամբ և մաղթել արդյունավետ աշխատանք` հույս հայտնելով, որ նա իր գործունեությամբ կնպաստի երկու երկրների խորհրդարանական կապերի խորացմանը:

 

Խորհրդարանի ղեկավարը շնորհակալություն է հայտնել Կորեայի Հանրապետությանը 2011 թվականին ԱԺ լիագումար նիստերի դահլիճի տեխնիկական վերազինմանն աջակցելու համար: Գալուստ Սահակյանն իր երախտագիտությունն է հայտնել Կորեայի Հանրապետության խորհրդարանի ընդունելությունների սրահում Հայոց ցեղասպանության 100- րդ տարելիցին նվիրված ցուցադրության համար:

 

ԱԺ նախագահը պատրաստակամություն է հայտնել աջակցելու հայ-կորեական միջխորհրդարանական կապերի ակտիվացմանը և խորացմանը: Խորհրդարանի ղեկավարը կարևորել է նաև Կորեայի հետ առևտրատնտեսական, մշակութային, կրթության ոլորտներում փոխշահավետ համագործակցությունը:

 

Պակ Նո Փյոկը, շնորհակալություն հայտնելով ջերմ ընդունելության համար, նշել է, որ կանի ամենը միջպետական հարաբերությունները զարգացնելու և խթանելու համար:

 

Անդրադառնալով տարածաշրջանային խնդիրներին՝ դեսպանը նշել է, որ Կորեայի Հանրապետությունը Լեռնային Ղարաբաղի խնդրի լուծումը տեսնում է բացառապես խաղաղ ճանապարհով՝ ԵԱՀԿ Մինսկի խմբի համանախագահների շրջանակում:

 

Դեսպանը ևս կարևորելով մշակույթի ու կրթության ոլորտներում փոխշահավետ համագործակցությունը՝ հույս է հայտնել, որ 2014 թվականի հուլիսի 4-ին Սեուլում ստորագրված «Հայաստանի Հանրապետության կառավարության և Կորեայի Հանրապետության կառավարության միջև մշակույթի, սպորտի և կրթության բնագավառներում համագործակցության մասին» համաձայնագիրը Հայաստանի խորհրդարանը կվավերացնի:

 

Գալուստ Սահակյանը շնորհակալություն է հայտնել Կորեայի Հանրապետությանը Հայաստանի համար կարևոր նշանակություն ունեցող հարցերի շուրջ հավասարակշիռ դիրքորոշում ունենալու համար:

Զրուցակիցները կարևորել են երկու երկրների խորհրդարանների բարեկամական խմբերի փոխայցերը և միջազգային խորհրդարանական հարթակներում փոխգործակցությունը: