Կա՛մ ընդմիջում, կա՛մ պետք է անվտանգություն կանչեի Զ. Փոստանջյանին տանեին. Է. Շարմազանով

Tert.am-ը գրում է.

Կա՛մ 30 րոպե ընդմիջում, կա՛մ պետք է կանչվեր անվտանգություն, որը «Ժառանգություն» խմբակցության պատգամավոր  Զարուհի Փոստանջյանին Շուրիկի նման գրկած` պետք է հեռացներ ամբիոնից: Այս մասին Ազգային ժողովում հայտարարեց ԱԺ փոխնախագահ,  ՀՀԿ խոսնակ Էդուարդ Շարմազանովը` մեկնաբանելով այն, որ Զարուհի Փոստանջյանի` թեմային չվերաբերող ելույթը դադարեցնելու համար վերցրեց 30 րոպե ընդմիջում:
 

Հիշեցնենք, որ Վիճակագրական ազգային ծառայության 2016-18թթ. տարեկան ծրագրի քննարկումը ելույթի ժամանակ Զարուհի Փոստանջյանը քաղաքացիական անհնազանդության կոչեր արեց,  այդ թվում նաև հարկերը չմուծելու մասին, նիստը վարող Էդուարդ Շարմազանովը կոչ արեց իր «կապրիզները» իր շրջապատում անել , ապա անգամ նկատեց` մի ջենտլմեն չկա՞ դուրս հրավիրի պատգամավորին: Այնուհետև  ԱԺ փոխնախագահն անջատեց Փոստանջյանի խոսափողը,  սակայն վերջինս շարունակում էր համառորեն մնալ ամբիոնի մոտ: Քիչ անց ԱԺ փոխնախագահը հայտարարեց 30  րոպեանոց ընդմիջում:
 

Նախքան այդ դահլիճ շտապող ԱԺ փոխնախագահը լրագրողներին տեղեկացրեց, որ Զարուհի Փոստանջյանին տալու է 2 րոպե 40 վայրկյան և նշեց,  գործել է բացառապես ԱԺ կանոնակարգ–օրենքի շրջանակներում:
 

Արդեն միջանցքում` ՀՀԿ խոսնակը նկատեց, որ ստիպված էր 30 րոպեանոց ընդմիջում վերցնել, քանի որ ԱԺ-ում պետք է ապահովվի բնականոն աշխատանք: «Իսկ Դուք տեսա՞ք, որ պատգամավորը … չեմ կարող ասել` ի վիճակի չէ … կա՛մ չի ցանկանում, կա՛մ ուզում է խափանել մեր աշխատանքը, ես իրան հիմա հնարավորություն կտամ ուղղվելու»,- ասաց Էդուարդ Շարմազանովը։

 

Վերադառնալով դահլիճ` Զարուհի Փոստանջյանը շարունակեց իր ելույթը, և չնայած ԱԺ փոխնախագահը լրագրողների հետ զրույցում ասել էր, որ Զարուհի Փոստանջյանին թույլ է տալու 2 րոպե 40 վայրկյան ելույթ ունենալ, նրան թույլատրեց 3 րոպեանոց ելույթ, ապա հայտարարեց, որ ժամանակը սպառված է:
 

«Եթե մենք հարկերը չվճարենք, բանակ ո՞նց ենք պահելու, տատիկ-պապիկների կենսաթոշակը ո՞նց ենք տալու, ի՞ր աշխատավարձը  ոնց ենք տալու»,–  Զ.Փոստանջյանն ելույթից հետո -նկատեց Էդուարդ Շարմազանովը: