Քեսաբ-Լաթաքիա մայրուղին ազատագրված է

Lurer.com-ը գրում է.

Սիրիական բանակը, ազատագրելով Քեսաբի մերձակայքում գտնվող Զահի լեռնագագաթը, ազատագրել է նաև Քեսաբ-Լաթաքիա մայրուղին: Ինչպես տեղեկացնում են Հալեպի «Գանձասար» շաբաթաթերթի խմբագրությունից, ազատագրվել են մայրուղու բոլոր այն բլուրներն ու անտառները, որոնք օգտագործվում էին ահաբեկչական խմբավորումների կողմից՝ դիպուկահարների տեղավորման կամ շրջանի բնակչության հրթիռակոծման նպատակով:

Բացված է Քեսաբ-Լաթաքիա մայրուղին՝ «Քասդալ Մուաֆ»-ը՝ մինչև Քեսաբի սահմանային անցակետը: Երեք տարի փակ լինելուց հետո՝ դեկտեմբերի 13-ին մի շարք փոխադրամիջոցներ օգտագործել են այդ ճանապարհը Լաթաքիայից Քեսաբ ուղևորվելու համար:

Սիրիական բանակը ներկայումս վերականգնում է մայրուղին՝ ականազերծելով ու ասֆալտապատելով այն, մինչև ճանապարհահատվածը վերջնականապես կհայտարարվի ապահով տարածք:

Աղբյուրը տեղեկացնում է, որ քեսաբցիները ներկայումս ավելի հանգիստ են, իսկ շրջանը զերծ է թեժ բախումներից: