Թուրքիայի օդուժը ռմբակոծել է սահմանային առեւտուր անող քրդերին

Թուրքիայի զինված ուժերի օդանավերի ռմբակոծությունից սպանվել են 4 երեխաների հայր Մաջիթ Օլմեզ ու 10 երեխաների հայր Հուրշիթ Օլմեզը։

Նման հայտարարություն է արել Թուրքիայի քրդական «Ժողովուրդների դեմոկրատական» կուսակցության պատգամավոր Ֆերհաթ Էնջուն։

Թուրքական Diken կայքի փոխանցմամբ՝ դեռեւս 2011թ-ին Թուրքիայի օդուժի ռմբակոծության հետեւանքով բազմաթիվ ազգականներ կորցրած Ֆերհաթ Էնջուն ցոսկայքերով գրառում է արել՝ շեշտելով, որ Ուլուդերե շրջանի Անդաչ գյուղի 2 բնակիչներ սպանվել են Իրաքի հետ սահմանին՝ առեւտուր անելու ժամանակ։

Նա նշել է, որ 4 եւ 10 երեխաների հայրերի դիակները վերցնելու համար դեպի սահման մեկնող գյուղացիները հանդիպել են զինվորականների արգելքին։

Նշենք, որ թուրքական կողմը պնդել էր, թե ռմբակոծել են PKK-ի (Քուրդիստանի բանվորական կուսակցություն) ճամբարները։