Կայսրություն ստեղծելու վերաբերյալ Էրդողանի երազանքը վտանգավոր է Թուրքիայի համար. The Guardian

Tert.am-ը գրում է.

Վերջին շրջանում Անկարայի վարած արտաքին քաղաքականությունն ագրեսիվ է դարձել, ու Ռուսաստանի հետ կոնֆլիկտը ցույց է տալիս, որ նա շատ հեռուն է գնացել, գրում է բրիտանականThe Guardian թերթը։

Սիրիայի նախագահ Բաշար ալ-Ասադին ուղղված աջակցությունը թուլացնելու փորձի ընթացքում Թուրքիան նոյեմբերի 24-ին խոցեց ռուսական ինքնաթիռը, ինչն անգամ «սառը պատերազմի» տարիներին կդիտարկվեր որպես աննախադեպ դեպք:

Թուրքիայի նախագահ Ռեջեփ Թայիփ Էրդողանի նման «ավանտյուրան» երկիրը կարող է ավերման հասցնել:

The Guardian-ի սյունակագրի կարծիքով՝ Թուրքիայի գործողությունները կարելի է բացատրել թերարժեքության բազմադարյա բարդույթով ու  իշխանության տենչով:

Դրա ֆոնին Էրդողանն իրեն պատկերացնում է որպես «Օսմանյան կայսրության վերականգնող»:
Թուրքիայի նախագահը, սակայն, կարծես մոռացել է այն մահացու սպառնալիքը, որը գալիս է ոչ թե Արևմուտքից, այլ Արևելքից, մասնավորապես՝ Իրաքից ու Սիրիայից:

Ռուս-թուրքական հակամարտության արդյունքում ԱՄՆ-ն ու Եվրոպան ամեն դեպքում շարունակելու են համագործակցել Ռուսաստանի հետ՝ ահաբեկչության դեմ պայքարի հարցում՝ այն դեպքում, երբ Թուրքիան կարող է մեկուսացման մեջ մնալ, ընդգծում է պարբերականը:

Մինչ վերջերս թուրք առաջնորդը բավական հաջողակ էր, իսկ վերջին իրադարձությունները պետք է դաս լինեն նրա համար այն մասին, որ պետք չէ սադրել Ռուսաստանին, կարծում է հոդվածագիրը։