Հայտնիները՝ «Քարե դարդ»-ի փակ դիտմանը, և թե ինչու Վաչեն հայտնվեց քարե դարում
15:15 , 5 դեկտեմբեր, 2015Ի՞նչ կլինի, եթե Ձեր պատքերի պատճառով հայտնվեք քարե դարում: Գիտեմ, կասեք, որ հնարավոր չէ այդպես, բայց ATV հեռուստաընկերության «Քարե դարդ» սիթքոմը դիտելուց հետո կհամոզվեք, որ լավ էլ հնարավոր է: Օրինակ՝ Վաչեն ժամանակի մեքենայի շնորհիվ պատահաբար հայտնվում է քարե դարում, որտեղ էլ սկսվում են նրա արկածները:
«Yerevan Mall»-ի Կինո պուրակում կայացավ «Քարե դարդ» սիթքոմի առաջին սերիայի փակ դիտումը, որին ներկա էին ինչպես ամբողջ ստեղծագործական կազմը, այնպես էլ հայկական շոու բիզնեսի ներկայացուցիչները: Մինչև դիտումը դերասաններ Վաչե Թովմասյանը, Արմուշը, Անատի Սաքանյանը, Աննա Մանուչարյանը, Հակոբ Հակոբյանը և ռեժիսոր Վարդան Հակոբյանը պատասխանեցին լրագրողների հարցերին: BlogNews.am-ի ֆոտոխցիկը ֆիքսել է միջոցառման հետաքրքիր պահերը:
«Մենք շատ երկար ենք պատրաստվել այս սիթքոմին, սցենարը գրող խումբը շատ երկար ուսումնասիրություններ է արել, որպեսզի լավագույնս կարողանանք ներկայացնել սիթքոմը,-ասաց Վաչե Թովմասյանը,- որպես «Քարե դարդ» սիթքոմի պրոդյուսեր՝ ուզում եմ նշել, որ դա լիովին նոր ֆորմատ է թե՛ Հայաստանում, թե՛ աշխարհում: Հաշվի ենք առել և՛ սցենարական, և՛ ռեժիսորական, և՛ գրաֆիկական կողմը: Հեռուստադիտողի մոտ կարող է հարց առաջանալ, թե ինչպես են մարդիկ ապրում դինոզավրերի հետ և այդքան ազատ խոսում հայերեն, պատասխանեմ, որ սիթքոմն ազատ ֆորմատ է, և կարելի է այդպիսի փոփոխություն անել, որպեսզի հումորը լինի առաջին տեղում»։ Վաչեն շնորհակալություն հայտնեց Սարգիս Մնոյանին, ում պատկանում է նախագծի մտահղացումը, ինչպես նաև բոլոր այն մարդկանց, ովքեր աշխատել են նախագծի ստեղծման վրա:
Ուշագրավ է, որ նկարահանումների համար կառուցվել է հատուկ տաղավար, իսկ գրաֆիկական լուծումներն ավելի շատ ֆիլմ են հիշեցնում։ Ռեժիսոր Վարդան Հակոբյանն ընդգծում է, որ իրենք բոլորն էլ գիտակցում են, որ եթե չլինեն լավ դերասաններ, ամեն բան հօդս կցնդի. «Ինձ հաճելի է այս խմբի հետ աշխատել: Մենք ֆիլմ նկարահանելուն հավասար մոտեցում ենք ցույց տալիս, չենք սիրում ասել սիթքոմ: Մի մասը նկարահանում ենք տաղավարում, մնացածը՝ ինկրուստացիոն ֆոնի վրա, դա համարձակ էքսպերիմենտ է, և խնդրում եմ մի քիչ ըմբռնումով մոտենալ առաջին սերիային: Ստացել ենք այնպիսի արդյունք, որն այսօր հետաքրքիր է և գնալով ավելի կհետաքրքրանա»։
Նյութը` Սիրանուշ Գրիգորյանի
Լուսանկարները` Կարեն Հովհաննիսյանի