Այսօր նոր Հայաստանը երկունքի մեջ է, և ՀՀԿ–ն ապրում է իր վերջին օրերը. Րաֆֆի Հովհաննիսյան

Այսօր նոր Հայաստանը երկունքի մեջ է և Հանրապետական կուսակցապետությունը ապրում է իր վերջին օրերը: Այս մասին Ազատության հրապարակում «Նոր Հայաստան» նախաձեռնության հրավիրած հանրահավաքին իր ելույթում հայտարարեց «Ժառանգություն» կուսակցության նախագահ Րաֆֆի Հովհաննիսյանը:

«Հայաստանի ճակատագիրն ու ապագան այսօր մեր միջոցով, մեզ հետևողների, բռնի ուժով այս հանրահավաքից հետ պահված քաղաքացիներինն է, որոնք մի քանի ժամից միանալու են մեզ, և դառնալու միացյալ հրապարակ, որում լինելու է հնից նորը: Այսօր նոր Հայաստանը երկունքի մեջ է, և Հանրապետական կուսակցապետությունն ապրում է իր վերջին օրերը»,- հայտարարեց «Ժառանգության» առաջնորդը` վկայակոչելով տարբեր պաշտոնյաների ու ժողովրդին չներկայացնող «տղերքի» իր՝ գնահատմամբ ջղաձգումները: Այս հայտարարությունը ընդունվեց բուռն ծափերով:

«Պատերազմ են հայտարարել սեփական երկրի և քաղաքացիների նկատմամբ, և մենք թույլ չենք տալու, որ իրենք իրենց այս կեղծ հանրաքվեով ամրագրեն իրենց կուսակցապետությունը: Կորչի Հանրապետական կուսակցապետությունը, կեցցե՛ Հայաստանի Հանրապետությունը»,–հայտարարեց նա։

Րաֆֆի Հովհաննիսյանը հավելեց, որ հավատամքը, հույսը, սերը և հայրենիքը մեկն է և ամբողջական, իր անունը հավերժ է, պայքարը՝ հաղթանակ՝ Հայաստան. «Այսօր ճամփա ենք ընկնում, որը բերելու է ազատ, անկախ Հայաստան և որը կարող է լինել զոհողության ճանապարհ»։ Սակայն, ըստ նրա, դա կլինի «հաղթանակի, հարության և Հայաստանի Հանրապետության ճանապարհ»` առանց արյան»:

«Ոստիկաններ, ոստիկանապետեր և ուրիշներ, արյան աղբյուրները ուրիշ տեղ փնտրեք և սանձեք, որովհետև դուք եք պատասխանատվություն կրելու հայ մարդու թեկուզ մեկ կաթիլ արյան համար: Էս ի՞նչ վախ է, վախկոտություն, կեղծիքի, ստի մեջ թաթախված իշխանիկներ»,-դիմելով իշխանության տարբեր թևերին՝ հարցրեց Րաֆֆի Հովհաննիսյանը: