А321 ինքնաթիռը խոցելու վերաբերյալ ԻՊ-ի հայտարարությունը քարոզչություն է. Եգիպտոսի նախագահ

Tert.am-ը գրում է.

Եգիպտոսի նախագահ Աբդել Ֆաթահ աս-Սիսին «Իսլամական պետություն» ահաբեկչական խմբավորման հայտարարությունը ռուսական ուղևորատար А321 ինքնաթիռը կործանելու վերաբերյալ քարոզչություն է անվանել։

BBC-ին տված հարցազրույցում Եգիպտոսի նախագահն ընդգծել է, որ դեռ վաղ է եզրակացություններ անել ինքնաթիռի կործանման պատճառների վերաբերյալ։

«Բոլոր հետաքրքրված կողմերը կարող են մասնակցել այդ միջադեպի հետաքննությանը, սակայն քարոզչական հայտարարություններն այն մասին, որ ինքնաթիռը խոցել են ԻՊ-ի զինյալները, ուղղված են միայն տարածաշրջանում իրավիճակի ապակայունացմանը, որպեսզի փչացնեն Եգիպտոսի իմիջը։ Վստահեցնում եմ, որ երկրի այդ մասում իրավիճակը վերահսկվում է»,-ասել է նախագահը։

«Կոգալիմավիա» ավիաընկերության ինքնաթիռը կործանվել էր հոկտեմբերի 31-ին՝ Շարմ էլ Շեյխի օդանավակայանից թռիչք իրականացնելուց րոպեներ անց։ Ինքնաթիռում գտնված բոլոր 224 մարդիկ զոհվել են։

Աղետից հետո «Իսլամական պետություն» խմբավորումը հայտարարել էր, թե ինքն է կազմակերպել այդ ողբերգությունը, սակայն ոչ մի փաստ չկա։

«Կոգալիմավիայի» ղեկավարությունը հայտարարել է, որ ինքնաթիռը կործանվել է օդում՝ արտաքին ուժի ազդեցությամբ։