Ի՞նչ խորհուրդներ է տալիս մարզիչ Արման Ղարիբյանը և հայտնիներից ո՞ւմ է նա մարզում

Արմանը մեծացել է Երևանում, երեք տարի ապրել է Մոսկվայում, իսկ հայրենիք վերադառնալուց հետո սկսել է զբաղվել սպորտով: Նա ժամանակին որպես ֆոտոմոդել էր աշխատում, լուսանկարվել է մի քանի ամսագրերի համար, իսկ վերջերս էլ նկարահանվել է Սոֆի Մխեյանի տեսահոլովակում: Բայց Արմանի կարևոր և հիմնական գործը մարզչի աշխատանքն է. նա գեղեցիկ մարմիններ է կերտում իր յուրաքանչյուր այցելուի համար: BlogNews.am-ի հետ զրույցում Արմանը պատմել է քաշի նվազեցման հիմնական պայմանների մասին, բացատրել՝ ինչպես մկանային մասսա հավաքել, ինչպես նաև խոսել իր հայտնի հաճախորդների մասին: 

-Արման, որքա՞ն ժամանակ է, ինչ որպես մարզիչ ես աշխատում, և ի՞նչ կարևոր բան պետք է իմանա նիհարել ցանկացող յուրաքանչյուր մարդ։

-Արդեն մոտ յոթ ամիս է, ինչ մարզում եմ մարդկանց: Նիհարելու դեպքում պետք է կորցնել առավելագույն քանակի ճարպեր և պահպանել մկանային զանգված, իսկ մկանային զանգվածն ավելացնելը հակառակ գործընթացն է պահանջում: Այն մարդիկ, ովքեր ցանկանում են նիհարել, նախևառաջ պետք է հստակեցնեն սննդակարգը, հետո միայն զբաղվեն մարզումներով: Ես իմ յուրաքանչյուր հաճախորդի համար գրում եմ անհատական սննդակարգ: Բայց հետաքրքիրն այն է, որ պահ է լինում, երբ և՛ տղաները, և՛ աղջիկները հանձնվում են, կանգնում են կշեռքի վրա և տեսնում, որ իրենց ուզած քաշը չէ, դրանից նեղվում են, բայց իրականում խախտում են սննդակարգն ու չեն խոստովանում: Ամենակարևորն այն է, որ մարդիկ կարողանան պահել իրենց մոտիվացիան, իհարկե, պահ է գալիս, որ օրգանիզմը հոգնում է, քանի որ մենք ամեն անգամ նրան սթրեսի ենք ենթարկում:

-Ունե՞ք հատուկ մեթոդ, որ փորձում եք կիրառել Ձեր հաճախորդների դեպքում, որպեսզի չկորցնեն իրենց մոտիվացիան։

-Այո, օրինակ՝ լինում են դեպքեր, երբ իմ սաները լավ արդյունքի են հասած լինում, և այդ ամիս ես նրանց պարգևատրում եմ «cheat meal» տարբերակով, այսինքն՝ իմ հաշվին հյուրասիրում եմ նրանց այն ուտելիքները, որոնք նրանք են ուզում: Նաև մերսում եմ առաջարկում, ունեմ իմ մերսման սրահը, այսինքն՝ տալիս եմ նրանց այսպես ասած փաթեթ, որ կարող են օգտագործել: Սա նաև մոտիվացիա է, որ ամեն անգամ պայքարեն և արդյունքի հասնեն: Ես նաև հիմա լավ պրոֆեսիոնալ թիմ եմ հավաքել լուսանկարիչներից, օպերատորներից և փորձում եմ ինձ մոտ պարապող յուրաքանչյուր մարդու համար ստեղծել նաև նրա պորտֆոլիոն, իհարկե դա էլ իմ հաշվին է: Այսինքն՝ մարդն, իր լուսանկարները տեսնելով, երբեք էլ չի ցանկանա ուտել ինչ-որ համեղ խմորեղեն: Բացի դրանից, ես նրանց հետ օրը քսանչորս ժամ շփվում եմ. շատերը կան, որ դեպրեսիայի մեջ են ընկնում: Բայց այստեղ ամենակարևորը համբերություն է. ամեն անգամ, երբ դու մտնում ես մարզասրահ, դու որպես ուրիշ մարդ ես դուրս գալիս՝ էլ ավելի լավը:  

-Ձեզ համար ո՞րն է լավագույն մոտիվացիան, և արդյո՞ք լինում են պահեր, երբ Դուք էլ եք հանձնվում: Կարծում եմ՝ Ձեզ մոտ գալիս են, քանի որ տեսնում են այն արդյունքը, որին Դուք հասել եք:

-Այն մարդիկ, ովքեր վստահում են ինձ, մոտիվացիան իմ մեջ են տեսնում, իսկ դա ինձ համար մեծ պատիվ է, բայց երբ ես ինձ նայում եմ հայելու մեջ, դեռ չեմ տեսնում այն արդյունքը, որին ինքս ուզում եմ հասնել: Ինձ համար մոտիվացիայի այլ կերպարներ կան, ումով ես եմ հպարտանում և փորձում հասնել նրանց, բայց եթե անկեղծ ասեմ՝ երազում եմ անգամ անցնել նրանց:

-Քանի որ այս մարզաձևը դարձել է ավելի սիրված, ցանկացած մարդ փորձում է զբաղվել սրանով: Այս մարզաձևի ճյուղերը շատ տարբեր են՝ բոդիբիլդինգը, ֆիթնեսը, men’s Physique-ը, ֆիթնես բիկինին, բայց ամեն տեղ տարբեր են փիլիսոփայությունը և մարզումները, անգամ պահանջները: Ինձ համար ամենից առաջնայինը men’s Physique-ն է, որը կերտում է էսթետ մարմին: Օրինակ՝ բոդիբիլդինգում շատ կարևոր է մարմնի համաչափությունը, այսինքն՝ չափսեր ասվածը: Իմ բախտը բերել է, որ ես կարող եմ ինձ ամեն ինչ թույլ տալ ուտել, բայց եթե ես մի օր չքնեմ, երկու կիլոգրամ կորցնում եմ, իսկ դա ինձ համար մեծ վտանգ է: Ինձ համար քունը կարևոր է, ես իհարկե նիհարել չեմ ուզում, հակառակը՝ փորձում եմ ավելանալ ևս ութ կիլոգրամով և դառնալ 88 կգ, այնուհետև «չորանալ» և դառնալ մաքուր 83-84 կգ մկանային զանգված:

-Դու խոսում ես համաչափությունից, բայց շատ հաճախ տղաների դեպքում այդ համաչափությունը բացակայում է:  

-Կա նման խնդիր, այո՛: Երբ մտնում ես մարզասրահ, շատերի դեպքում տեսնում ես այդ սխալը, երբ վերևի հատվածում մկանները լավ զարգացած են, իսկ գոտկատեղից ներքև՝ թերի: Դրա միակ պատճառն այն է, որ ոչ ոք չի սիրում ոտքերը զարգացնել, իսկ այն ենթադրում է բավականին ծանր աշխատանք, շատերը պարզապես զլանում են դա անել, ուզում են ունենալ մկանուտ թևեր և կարծում են` այդպես դառնում են իրենց երազած տղամարդը: Նաև կա երկրորդ հանգամանքը՝ գենետիկան, հայերի գենետիկան թույլ չի տալիս մկանուտ ոտքեր ունենալ: Մենք ռուսների նման բարձրահասակ չենք, փոքր ենք, նիհար, դա է նաև պատճառը, որ ոտքերը մարզելը բարդ է:

-Շատերի համար մարզասրահ հաճախելն անգամ մի քիչ նորաձև է դարձել: Կարծում ես՝ ի վերջո նորաձևությա՞նն են ավելի շատ տուրք տալիս, թե՞ առողջ ապրելակերպին։

-Կարող եմ այս ամենին հիմնովին և փաստերով պատասխանել. եթե դա կրեր ոչ թե ձևական բնույթ, այլ մարդիկ գային՝ տրամադրված պարապելու, ապա բոլոր մարզասրահներում կտեսնեինք գեղեցիկ, պարապած մարդկանց: Բայց ես հանդիպում եմ տարիներով մարզասրահ հաճախող մարդկանց, և նրանց մոտ ոչինչ չի փոխվել, այսինքն՝ նրանք գալիս են ձևական՝ սելֆի անելու համար: Երեք հանգամանք կա, որոնց դեպքում կարող ես հասնել արդյունքի. հանգիստը, սնունդը և մարզվելը: Եթե երեքից մեկը խախտես, դու հաջողության չես հասնի, բայց այս մարզաձևն ամենաթանկ մարզաձևերից է, դու քո վրա շատ ներդրում պետք է անես, խոսքը հազարավոր դոլարների մասին է:

-Դու նաև խոսում ես այն հավելումների մասին, որոնք օգտագործում է մարզիկը հաջողության հասնելու համար։

-Սա շատ կարևոր թեմա է, քանի որ հայերի մոտ այսպես ասած «պահածոյացված» մտածելակերպ կա, որ եթե խմում ես սպիտակուց (պրոտեին) կամ ցանկացած բիոհավելում, դու օգտագործում ես քիմիա, բայց քիմիան հորմոնային խախտում է քեզ մոտ առաջացնում, ուժ է տալիս, ոտքերն են մարզվում, այսինքն՝ նորմալ չէ, երբ սկսում ես հորմոնային խախտման պատճառով աճել, դա այլ բան է, բայց սպիտակուցը, որը ստանում ես բնական բաղադրիչներից, ինչպե՞ս կարող է վնաս լինել: Եթե ամեն ինչին գիտակցաբար ես վերաբերում և ամեն ինչ չես չարաշահում, դա նորմալ է:  

-Մարզչի առօրյան միանշանակ տարբերվում է մնացած այն մարդկանց առօրյայից, ովքեր չեն մարզում: Արդյո՞ք դու ես քեզ համար սնունդ պատրաստում։

-Ասեմ այն, որ երբ Մոսկվայում էի և ապրում էի միայնակ, ինչպես ասում են, խոհարարական հմտություններ պետք է ձեռք բերեի: Դա ինձ համար մեծ փորձ էր՝ ստեղծել տարբեր համերի սոուսներ և, իհարկե, ճիշտ սնունդ: Իսկ երբ եկա Երևան, մայրիկս, ով ինձ աջակցում է ամեն հարցում, թույլ չի տալիս, որ ես մտնեմ խոհանոց: Այդ առումով իմ բախտը բերել է, և մայրս միշտ գիտի, թե ինձ համար ինչ պատրաստի: Կար ժամանակ, երբ մայրս դեմ էր ցանկացած հավելումների, իսկ ես ստիպված էի գիտական փաստարկներով ապացուցել, որ դա վնաս չէ: Հիմա ինձ համար ավելի հեշտ է, քանի որ սննդակարգի տեսանկյունից նա է ինձ համար դառնում մարզիչ: Ասեմ ավելին՝ ես նրան էլ եմ մարզում, օրերից մի օր որոշեցինք, որ նա էլ պետք է մարզվի:

-Հաճախ կարելի է մարզիկներից լսել, որ նրանց կողակիցն էլ պետք է իրենց բնագավառից լինի, քանի որ բավականին բարդ է հարմարվել նրանց ապրելակերպին: Դու է՞լ ես այդպես մտածում:

-Ասեմ, որ ես ունեմ լավ ընկերական շրջապատ, իսկ հարաբերություններում ավելի շատ դոմինանտ եմ և ում հետ շփվում եմ, ինքն է ինձ հարմարվում, ոչ թե ես՝ նրան: Իսկ ինչ վերաբերում է անձնական հարցերին, ես կլռեմ:

-Արման, գիտեմ, որ հայկական շոու բիզնեսի մի շարք հայտնիներին ես մարզում, կխոսե՞ս նրանց մասին: Որո՞նք էին նրանց՝ մարզասրահ գալու հիմնական պատճառները։

-Գիտեք՝ ցանկացած մարդու մոտ տարբեր պատճառներ կան, եթերային մարդկանց մոտ՝ առավել ևս, որովհետև արտաքինն առաջնային է: Շատերը կան, որ առաջարկ են ստանում ֆիլմում նկարահանվելու և դերում պետք է ունենան մկանոտ մարմին։ Նրանք ստիպված գալիս են, իհարկե՝ ժամանակավոր, բայց մարդիկ էլ կան, որ գալիս են, որևէ նկար են ցույց տալիս և ասում, որ այդպիսին են ուզում դառնալ: Ես միշտ եմ այդպես աշխատում, պահանջում եմ, որ ինձ նկար ցույց տան, որ ես կարողանամ իմանալ, թե ինչ են ուզում ստանալ, որպեսզի ճիշտ դիետա գրեմ: Կապ չունի՝ մարդը հայտնի է, թե՝ ոչ, ունի սննդակարգի խնդիր, իհարկե հասկանում եմ, որ համեղ ուտելը լավ բան է, բայց գեղեցիկ մարմինն ավելի հաճելի է: Առաջիններից մեկը եղել էր Արմուշը, ով ուներ առաջարկ նոր ֆիլմում նկարահանվելու, և նրան պետք էր մի քանի կիլոգրամ մկանային զանգված ավելացնել։ Նա շատ հաճելի մարդ էր, նրա հետ մարզումները կատակներով էին անցնում, և այդ ժամերն ամենասպասված էին ինձ համար: Օրինակ՝ ես երբ ասում էի՝ սա արա տասն անգամ, նա ավելի էր բարդացնում վարժությունները և փորձում էր անել ավելին:

Նարեկ Մակարյանն իմ լավ ընկերներից է, մեզ մոտ ստացվեց նրա մարմինն ավելի մկանոտ դարձնել, բայց ծանր գրաֆիկի պատճառով երկար մարզումները բարդ է պահպանել: Սուրեն Առուստամյանի հետ էլ եմ պարապում, իմ խորհուրդներով և ռեժիմով օգնում էի նրան, մեզ հետ էր նաև երգահան Կարեն Գրիգորյանը: Միշոն է եկել ինձ մոտ, նա խնդիր ուներ նիհարելու, բայց ծանր գրաֆիկի պատճառով դա մեզ մոտ շատ բարդ էր ստացվում, նա չէր քնում: Գոռ Սուջյանն է ուզում մկանային զանգված ավելացնել, նա պետք է գա:

P.S Ի դեպ, Արմանի հետ հանդիպեցինք երևանյան սրճարաններից մեկում, և նա կանաչ թեյ խմեց, ասաց, որ դա շատ օգտակար է, օգնում է մկանային աճին, դիմադրողականությունն է բարձրացնում: 

Նյութը` Սիրանուշ Գրիգորյանի