Չեռնոգորիայի վարչապետը մեղադրել է Ռուսաստանին ցուցարարներին աջակցելու համար

Tert.am-ը գրում է.

Չեռնոգորիայի (Մոնտենեգրո) վարչապետ Միլո Ջուկանովիչը հայտարարել է, որ Ռուսաստանը սերբ ազգայնականների հետ միասին ակտիվ մասնակցում է երկրում իշխանափոխության կոչեր հնչեցնող հակակառավարական ցույցերի կազմակերպմանը, հաղորդում է korrespondent.net-ը:

Ջուկանովիչի խոսքով՝ Չեռնոգորիայում վերջին իրադարձություններն իրենցից պետական հեղաշրջման փորձ են ներկայացրել, և վարչապետը ոչ մի կասկած չունի ցույցերին «սերբական ազգայնական շրջանակների» ներգրավվածության հարցում։

«Չկան նաև կասկածներ, որ Ռուսաստանն ունի և շարունակում է ակտիվ դեր խաղալ Պոդգորիցայում իշխանության դեմ ցույցերի կազմակերպման մեջ։ Այստեղ պետք չեն հատուկ մեկնաբանություններ։ Բավական է նայել երեք հաղորդումներին, որոնք ես արդեն նշել եմ»,- հայտարարել է Ջուկանովիչը։

Այդ եզրակացությունը վարչապետն արել է Ռուսաստանի ԱԳՆ-ի 3 հայտարարությունների հիման վրա՝ Վաշինգտոն Ջուկանովիչի այցի, ցույցերի առաջին փուլի և երկրի՝ ՆԱՏՕ տանող ճանապարհի մասին:

Ավելի վաղ հաղորդվել է, որ Չեռնոգորիայի (Մոնտենեգրո) մայրաքաղաք Պոդգորիցայում հակակառավարական ցույցը շաբաթ օրն ուշ երեկոյան ավարտվել է խորհրդարանի շենքի վրա գրոհի փորձով, ինչից հետո ոստիկանությունը ցրել է ցուցարարներին հատուկ միջոցների օգնությամբ: Երկրի ներքին գործերի նախարարության տվյալներով՝ բախումների հետևանքով վիրավորվել է 15 ոստիկան և 24 քաղաքացիական անձ, հիմնականում՝ արցունքաբեր գազի հետևանքով։