Եվրոպայի Հայ դատի գրասենյակը ողջունում է «Փերինչեքն ընդդեմ Շվեյցարիայի» գործով վճիռը

Tert.am-ը գրում է.

Եվրոպայի Հայ դատի գրասենյակը ողջունում է այսօր Մարդու իրավունքների եվրոպական դատարանում «Փերինչեքն ընդդեմ Շվեյցարիայի» գործով վճիռը, որում Հայաստանի Հանրապետությունը ներգրավված է՝ որպես երրորդ կողմ։

Եվրոպայի Հայ դատի գրասենյակի հաղորդակցության պատասխանատու Բեդո Դեմիրճյանը Ստրասբուրգում նշեց, որ ողջունելի է դատարանի վճռի հատկապես այն կետը, որով Մեծ պալատը փոխեց դատարանի ստորին պալատի որոշումը, որ Ցեղասպանության հարցն այս դատարանում քննարկման հարց չէ։

Ըստ Բեդո Դեմիրճյանի՝ կարևոր է դատարանի արձանագրումն առ այն, որ մենք՝ հայերս, արժանապատվության և հարգանքի պաշտպանության իրավունք ունենք։ Նա նաև նշեց, որ իրենք այդ առումով գոհ են այսօր եվրոպական բարձրագույն դատարանի կողմից կայացրած որոշումից: