«Ժողովուրդ». Վալերի Պերմյակովի պատժի կրման հարցում ՀՀ և ՌԴ դատախազությունները վերջնական համաձայնության են եկել
07:53 , 4 սեպտեմբեր, 2015
«Ժողովուրդ» օրաթերթը գրում է.
««Ժողովուրդ»–ի տեղեկություններով՝ գյումրեցի Ավետիսյանների ընտանիքի յոթ անդամների սպանության մեջ մեղադրվող Վալերի Պերմյակովի պատժի կրման հարցում Հայաստանի և Ռուսաստանի դատախազությունները վերջնական համաձայնության են եկել։ Ըստ այդմ, մինչև դատավարության ավարտը և Պերմյակովի նկատմամբ արձակվելիք դատավճռի ուժի մեջ մտնելը, կալանքի տակ գնվելիս նա կշարունակի պահվել ՌԴ–ի՝ Գյումրիում տեղակայված 102-րդ ռազմաբազայում։
Իսկ դատավճռի ուժի մեջ մտնելուց հետո Պերմյակովը կհանձնվի Հայաստանի իրավապահներին և իր պատիժը կկրի ՀՀ քրեակատարողական հիմնարկներից մեկում։ Հիշեցնենք, որ Պերմյակովի գործը ՀՀ իրավապահներին հանձնելուց հետո, երբ արդեն հստակ պարզ դարձավ որ նրա դատավարությունը տեղի է ունենալու ՀՀ Շիրակի մարզի ընդհանուր իրավասության դատարանում, միակ չլուծված հարցը մնացել էր այն, թե դատավարությունից հետո նա որտեղ է կրելու պատիժը։ Ինչպես պարզեցինք՝ այս հարցը ևս փաստորեն լուծվել է»,–գրում է թերթը։