Թուրքիան ներկայումս գլխավորում է աշխարհի ամենահարուստ երկրների խումբը. Չավուշօղլու

Թուրքական Haberler.com կայքի փոխանցմամբ՝ Թուրքիայի արտգործնախարար Մևլյութ Չավուշօղլուն, մեկնաբանելով այսօր Ադրբեջանի ու Թուրքմենստանի արտգործնախարարների հետ կայանալիք եռակողմ հանդիպումը, հայտարարել է, որ Թուրքիայի, Թուրքմենստանի ու Ադրբեջանի միջև գործում է մեխանիզմ, որը ծառայում է տարածաշրջանի կայունությանը. «Մենք ունենք Թուրքիա-Թուրքմենստան-Ադրբեջան մեխանիզմ։ Նմանատիպ մեխանիզմները գործարկված են տարածաշրջանի կայունության համար»։

Չավուշօղլուն հայտարարել է, որ Թուրքմենստանի ու Ադրբեջանի արտգործնախարարների հետ այսօր հանդիպելու է Անթալիայում և հիշեցրել է, որ նոյեմբերին էլ Անթալիայում անցկացվելու է G20-ի գագաթնաժողովը. «Թուրքիան ներկայումս գլխավորում է աշխարհի ամենահարուստ երկրների խումբը։ Մեր երկիրն արժանի է նրան, որ Անթալիայում անհրաժեշտ ձևով անցկացվի G20-ի գագաթնաժողովը»։

Հաղորդվում է, որ Թուրքիայի, Թուրքմենստանի ու Ադրբեջանի արտգործնախարարների նախորդ եռակողմ հանդիպումն անցկացվել է հունվարի 29-ին Աշգաբադում։

Հիշեցնենք, որ սրանից առաջ թուրքական մամուլը գրել էր, որ Թուրքիան հայտնվել է G20-ից դուրս մնալու վտանգի տակ։ Թուրքիան G20-ի նախագահությունն ստանձնել է 2014 թվականի դեկտեմբերի 1-ից։