ԱԺ–ում սահմանադրական բարեփոխումների նախագծի լսումներ կանցկացվեն. Հովհաննես Սահակյան

Tert.am-ը գրում է.

ԱԺ պետաիրավական հանձնաժողովի նախագահ, «Հանրապետական» խմբակցության անդամ Հովհաննես Սահակյանը Tert.am-ի հետ զրույցում հայտնեց, որ սահմանադրական բարեփոխումների շուրջ լինելու են Ազգային ժողովի լսումներ: Նա կրկնեց ՀՀ Նախագահ Սերժ Սարգսյանի խոսքը, որ սահմանադրական բարեփոխումների մշակման հարցում քարացած ու դոգմատիկ չեն լինելու: Անդրադառնալով նաև նրան, որ ըստ վենետիկցիների՝ նախատեսվելու են միասեռ ամուսնություններ, նա առաջարկեց հարցն արհեստական չդարձնել, քանի որ հայերի 99.9 տոկոսն ընդունում է կնոջ և տղամարդու ամուսնությունը:

-Պարո՛ն Սահակյան, սահմանադրական բարեփոխումների շուրջ քննարկումների երեկվա ձևաչափից հետո՝ Վենետիկի հանձնաժողով, «Հանրապետական» և այլ խմբակցություններ, մասնագիտական հանձնաժողով, երբ նրանք ևս մեկ անգամ ներկայացրեցին իրենց դիտարկումները իրենց 1 ամիս առաջվա եզրակացության ներկայացումից առաջ և հետո կտրվածքով, սրանից հետո մասնագիտական հանձնաժողովն ի՞նչ սկզբունքով է աշխատելու: Այսինքն, առարկելո՞ւ են որոշ հարցերի հետ կապված, նրանց, քաղաքական ուժերի առաջարկների ո՞ր մասն են ներառելու փաստաթղթի հետագա լրամշակումներում, որ մասը՝ ոչ, իրենց դիրքորոշումը համարելով սկզբունքային՝ մի շարք վիճահարույց կետերի առնչությամբ:

-Մենք տեսանք, որ և՛ մասնագիտական խումբը, և՛ սահմանադրական բարեփոխումների նախաձեռող, երկրի Նախագահ Սերժ Սարգսյանը, ինչպես ի սկզբանե նշում էինք, և սա ապացուցվեց, պատրաստ են քննարկումների: Որ այն փաստաթուղթը, որը ներկայացվել է հանրությանը, դառնա քննարկումների առարկա: Եվ երեկվա քննարկումն էլ միտված էր նրան, որ քաղաքական ուժերն անձամբ իրենց դիտողությունները, առաջարկները, վերապահումները, դիրքորոշումները հնչեցնեն Վենետիկի հանձնաժողովի մոտ ու անձամբ ստանան պատասխանները, որպեսզի չստացվի, որ գնացին, համոզեցին, բերեցին, և այլն, և այլն:

Տեսեք՝ Վենետիկի հանձնաժողովն ինքը մասնագիտական, այսպես ասենք՝ մասնագետների խումբ է, որի խնդիրը հետևյալն է՝ տալ որևէ ներկայացված փաստաթղթի մասնագիտական ու փորձագիտական եզրակացություն: Խնդիրն այն է, որ կարևոր դրույթները, որ ամբողջ աշխարհում, կարծես թե, մեկ ուղղությամբ են գնում՝ մարդու իրավունքներ, ազատություններ, և այլն, դրանք համապատասխանում են եվրոպական չափանիշներին: Այն խնդիրները, որոնք քաղաքական դաշտի լուծելու խնդիրներն են, այսինքն՝ ենթակա են կարգավորման քաղաքական ուժերի կողմից՝ որոշումների ու համաձայնությունների միջոցով, և այդ համաձայնության արդյունքում ծնված փաստաթուղթը ներկայացնեն ժողովրդի դատին և որը, ըստ էության, լինի ժողովրդի և քաղաքական ուժերի կոնսենսուսի արդյունքում ձևավորված մի փաստաթուղթ, դա մեր որոշելիքն է: Ըստ որում, «մեր»-ի մեջ մտնում է և՛ իշխանությունը, և՛ ընդդիմությունը, և՛ «այո»-ի, և՛ «ոչ»-ի կողմնակիցները: Եվ այստեղ շատ կարևոր է նաև «ոչ»-ի կողմնակիցների դիրքորոշումն ու նաև՝ խոսքը: Թե ինչպիսի պատճառաբանություն, մոտեցում ու տեսակետ են ներկայացնում իրենք:

Երբ Վենետիկի հանձնաժողովի հետ հանդիպմանը լսեցի 1-2 ընդդիմադիրների ելույթներ, տպավորություն ունեցա, որ բացի քաղաքական շեշտադրումներից, այլ տեղ չեն կարողանում գնալ, մասնագիտական խոսք չեն կարողանում ասել: Բայց, այնուամենայնիվ, և՛ հնչած առաջարկները և՛ Վենետիկի հանձնաժողովի խոսքը կա, այդ ամենը, ես վստահ եմ՝ մասնագիտական հանձնաժողովն անպայման հաշվի կառնի, իսկ մինչ այդ փաստաթուղթն Ազգային ժողովում երկար ճանապարհ կանցնի:

Որպես գլխադասային հանձնաժողովի նախագահ՝ խոսել եմ ԱԺ նախագահի հետ, որ անպայման մինչև մեր հանձնաժողովում քննարկելը այն անցնի հասարակական լսումներ: Լսումների օրվա հետ կապված լրացուցիչ կհայտնեմ: Բոլոր այս քննարկումների ընթացքում բոլոր այս շեշտադրումները, նաև՝ Վենետիկի հանձնաժողովի հանդիպման, և՛ լսումների ժամանակ անպայման կներկայացվեն: Եվ չհասկացված, չըմբռնված, կամ կասկածանքի տեղիք թողնող հարցեր ու հարցադրումներ չեն մնա:

-Կարո՞ղ եք ասել՝ կոնկրետ Վենետիկի հանձնաժողովի պնդումը, որ 89-րդ հոդվածը, կապված երկրորդ փուլի հետ, հանվի, ի՞նչ կլինի այդ դրույթի հետ:

-Նախ, մասնագիտական խումբը միշտ էլ աշխատել է այն քաղաքական ուժերի ու գործիչների հետ, որոնք առաջարկություններ են ներկայացրել բովանդակային քննարկման դաշտում: Եվ նաև Նախագահի խոսքն էր, որ փաստաթուղթը մեզ համար դոգմա չէ, մենք քարացած չենք, մենք չենք ասում՝ սա ու վերջ, և փոփոխման ենթակա չէ: Ասում ենք, որ պետք է քննարկենք, փոփոխենք:

Ինչ վերաբերում է 89-րդ՝ ԱԺ-ում կայուն մեծամասնության ապահովմանը, «կայուն» բառն ինքնին դրական ասոցացում է, անկախ ամեն ինչից ու թե որտեղ է այն օգտագործվում: Եվ, միևնույն ժամանակ, մենք նշում ենք, որ շատ կարևոր է այդ կայունությունը: Իսկ երկրորդ փուլո՞ւմ կանցնի, թե երկրորդ փուլը ո՞նց կանցնի... Ես պետք է նորից նշեմ, որ սա բացառապես Ընտրական օրենսգրքի խնդիրն է և բացառապես դրանով է ենթակա կարգավորման, և այս առումով պետք է ասեմ, որ ԸՕ-ն նորից շատ լայն քննարկման առարկա կարող է դառնալ: Այսինքն՝ մենք Սահմանադրության մեջ պետք է բացառապես ամրագրենք 100 տոկոսանոց համամասնական ընտրակարգը, խորհրդարանական կառավարման ձևը:

-Վենետիկի հանձնաժողովի անդամը, պատասխանելով հարցին, թե երևանյան հանդիպումների ընթացքում ի՞նչ համաձայնության են եկել Սահմանադրական փոփոխությունների հանձնաժողովի հետ միասեռ ամուսնություններին վերաբերող հոդվածների շուրջ, ասաց, որ նույնասեռ ամուսնությունները պետք է թույլատրվեն՝ ըստ ՄԻԵԴ-ի: Դուք և՞ս դա կարող եք պնդել, նաև, որ հենց այդպես էլ կլինի՝ ըստ Սահմանադրության:

-Մենք հայի տեսակն ենք, հայ ազգն ենք՝ մեր դարերով եկած պապական ավանդույթներով և ընդունում ենք կնոջ և տղամարդու ամուսնությունը: Ինձ համար որևիցե մի եվրոպական չափանիշ լինի, արևմտյան, հյուսիս-հարավյան... իմ ընտանիքում, իմ երեխաներին ես դաստիարակում եմ մեր ավանդական արժեքներով: Եվ վստահ եմ՝ իմ պես է մտածում մեր ազգաբնակչության 99.9 տոկոսը:

Այնպես որ, չեմ ուզում այդտեղ արհեստական խնդիր կամ պրոբլեմ տեսնել, ու այդ հարցը քննարկման առարկա չդարձնենք: